ءسابينا التىنبەكوۆا: شياڭگاڭ جىگىتتەرى وتە تارتىمدى، ءبىراق مەن ۆولەيبولعا عانا توقتايمىن

استانا. قازاقپارات - ۆولەيبولشى قىز ءسابينا التىنبەكوۆا شياڭگاڭنان ورالدى، ول تەلەۆيزيالىق شوۋلارعا قاتىسىپ، اتاقتى ادامدارمەن تانىستى، تابىنۋشىلارىمەن كەزدەسىپ، جاتتىقتى، - دەپ حابارلايدى «ك ت ك» تەلەارناسى.

تەلەارنا مالىمەتى بويىنشا، بۇل قىزمەتتىك ءىس ساپار بولدى، سەبەبى ءسابيناعا جاقىندا بەيرەسمي تۇردە وتە جاۋاپتى تاپسىرما بەرىلدى، ول - قازاقستاننىڭ اتىن شەتەلگە شىعارۋى كەرەك.

قازاقستاندىق تانىمال ۆولەيبولشى ءسابينا التىنبەكوۆا شياڭگاڭعا ۇشىپ كەلگەندە ونىڭ جانكۇيەرلەرى اراسىندا اجيوتاج تۋعانى بۇعان دەيىن حابارلانعان بولاتىن. جانكۇيەرلەر ونىڭ ءاربىر ءىزىن اڭدىپ، ءار سوزىنەن ۇستاپ وتىردى.

ءسابينا شياڭگاڭدا شوۋدى اتاقتى اكتەر كيەۆين چەنمەن جۇرگىزدى. «ءسابينا - تاماشا قىز، مەن ونىمەن ءارى قاراي دا ارالاسقىم كەلەدى. ونىڭ مىنەزى تاماشا»، - دەپ مويىندادى ءارتىس.

قىزدىڭ ايتۋىنشا، ول ءوز ۋاقىتىن ايامايدى، ەڭ باستىسى قازاقستان تۋرالى كوپ ادام بىلسە بولدى. «مەن بۇكىل الەمدى ارالاپ، ۆولەيبول ارقىلى ەلىمدى تانىتقىم كەلەدى»، - دەدى ول سۇحبات بارىسىندا.

قىتايداعى اتاقتى جۋرنالداردىڭ ءبىرىنىڭ جۋرناليستى ونىڭ جىگىتتەرگە قاتىستى كوزقاراسىن ءبىلۋ ماقساتىندا قويعان سۇراعىنا ول: «بۇل سۇراقتى 23 جاسقا قاراي قويۋعا بولادى، مەنىڭ بار زەيىنىم قازىر ۆولەيبولدا، شياڭگاڭ جىگىتتەرى وتە تارتىمدى، ءبىراق مەن ۆولەيبولعا عانا توقتايمىن»، - دەپ جاۋاپ بەردى.

ەسكە سالا كەتەيىك، ءسابينا التىنبەكوۆا وڭتۇستىك-شىعىس ازيادا وتكەن 19 جاسقا دەيىنگى قۇرلىقتىق بىرىنشىلىكتەن كەيىن تانىمال بولا باستادى. بىرنەشە اپتانىڭ ىشىندە اقتوبەلىك قىزدىڭ سۇلۋلىعىنا تامسانعان ازيادا جۇزدەگەن مىڭ تابىنۋشى پايدا بولدى. قىزعا جارناما مەن مودەل بيزنەسىنە بايلانىستى كوپتەگەن كەلىسىم-شارت پەن ۇسىنىستار ايتىلدى. ءبىراق ءسابينا ۇسىنىستىڭ باسىم بولىگىنەن باس تارتىپ، سپورتتىق مانسابىن تاڭدايتىنىن ايتتى.