قوي باققانعا قولداۋ بار

استانا. قازاقپارات - قازىر قوي باققانعا دا مەملەكەت تاراپىنان قولداۋ بار. ۇساق مالدىڭ اسىلىن باپتاپ، ەت وندىرۋگە كىرىسكەندەر وزىپ جاتىر.

مەملەكەتتىك «التىن اسىق» باعدارلاماسى باستاۋ العالى كوپ بولعان جوق.

دەگەنمەن سىر ءوڭىرىنىڭ شوپاندارى جەڭىل پايىزدى نەسيەنىڭ شاراپاتىن كورىپتە ۇلگەردى. «مال وسىرسەڭ قوي ءوسىر، پايداسى ونىڭ كول- كوسىر». 

قىزىلوردالىق تەمىربەك اسىلبەكوۆ -  ءدال وسى دانالى ءسوزدىڭ ءمانىن تەرەڭ تۇسىنە بىلگەن جان. ونىڭ ۇساق مال ۇستاپ، شاعىن كاسىپكە بەت بۇرعانىنا 10 جىل بولىپتى.

بۇگىندە مەنشىگىندەگى تۇلىك سانى 4 مىڭنان استى. ەندى ول قويدىڭ اسىل تۇقىمدىسىن، ياعني سالماقتى، ەتتى كەلەتىنىن بورداقىلاۋعا باعىت العان.

تەمىربەك اسىلبەكوۆ، شارۋاشىلىق ءتوراعاسى:

- «التىن اسىق» باعدارلاماسى بويىنشا 24 ميلليون اقشا الدىق. سوعان 1 ميلليون 200 مىڭ اسىلتۇقىمدى قوي الدىق. قالادا 2 ساۋدا نۇكتەسى بار. سول جاقتا ساتىلادى. بەلكول كەنتىندە مال سويۋ الاڭىمىز بار. سول جەردە سويىلىپ، بازارعا جونەلتىلەدى.

نەسيە 7  جىلعا -  %7 بەن. مۇنداي قارجىلاي قولداۋ قويدىڭ كۇيىن كەلتىرىپ، ەت وندىرگەندەرگە بەرىلىپ جاتىر. بۇعان دەيىن ءمۇيىزدى ءىرى قارانىڭ بابىن تاپقاندار «سىباعادان» سىباعا السا، بىرەر ايدان بەرى «التىن اسىق» ۇساق مالى بارلاردىڭ بەرەكەتىن كىرگىزدى.

ماسەلەن، تەمىربەكتىڭ شارۋاشىلىعىندا ءارقايسىسى 30 كەلىگە شامالاساتىن 40-50 قوي كۇن سايىن سويىلىپ، ساۋدا سورەلەرىنە جول تارتادى.

ءداۋىرجان ءابۋوۆ، وبلىستىق اۋىلشارۋاشىلىعى باسقارماسىنىڭ باسشىسى:

- «التىن اسىق» باعدارلاماسى بويىنشا ءبىرىنشى جىل ىسكە اسىرىلىپ جاتىر، سوعان قاراماستان ءبىز ءقازىر 9 مىڭنان استام قوي الىپ، اۋىلشارۋاشىلىق تاۋار وندىرۋشىلەرىنە 190 ميلليونداي تەڭگە نەسيە الىندى. مەملەكەتتىك قولداۋ سىر وڭىرىندەگى تۇلىك باسىنىڭ كوبەيۋىنە ايتارلىقتاي سەبەپ بولعان. تەك وتكەن جىلدىڭ وزىندە وبلىستاعى ۋاق مال سانى %9 عا ارتىپ، 690 مىڭعا جەتىپتى. نارىقتا ەتكە دەگەن سۇرانىس ارتپاسا، كەمىمەيتىنى انىق. دەمەك تاياق ۇستاعان شوپانداردىڭ تىرلىگى ودان ءارى بەرەكەلى جالعاسىن تابارى ءسوزسىز.

www.24.kz