الماتىدا بەلگىلى تەاتر سىنشىسى اشىربەك سىعاي جايلى دەرەكتى فيلمنىڭ تۇساۋى كەسىلدى

الماتى. قازاقپارات - الماتىدا جاقىندا عانا دۇنيەدەن وتكەن بەلگىلى تەاتر سىنشىسى، ق ر مەملەكەتتىك سىيلىعىنىڭ لاۋرەاتى اشىربەك سىعايدىڭ ءومىرى مەن شىعارماشىلىعى جايلى دەرەكتى فيلمنىڭ تانىستىرىلىمى ءوتتى.

كارتينانى «قازاق فيلم» كينوستۋدياسى» ا ق تۇسىرگەن.

عابيت مۇسىرەپوۆ اتىنداعى قازاق مەملەكەتتىك بالالار جانە جاسوسپىرىمدەر تەاترىندا وتكەن «اشىربەك سىعاي: سىن ساردارى» فيلمىنىڭ پرەمەراسىنا بەلگىلى تەاتر جانە ونەر قايراتكەرلەرى، جازۋشىلار، ءا. سىعايدىڭ زامانداستارى مەن شاكىرتتەرى، ونەرسۇيەر قاۋىم جانە تۋىستارى قاتىستى.

دەرەكتى تۋىندىنىڭ رەجيسسەرى قاليلا وماروۆ 60 مينۋتتىق تاسپانى تۇسىرۋگە 1  جىل كەتكەنىن ايتتى. اشىربەك سىعاي كوزى تىرىسىندە وسى تۋىندىنى ەكى رەت تاماشالاعان كورىنەدى.

«فيلمدە ءاشاعانىڭ بالالىق شاعى وتكەن كەزدەرىنەن باستاپ، شىعارماشىلىق شىڭىنا دەيىن ءسوز ەتىلەدى. زامانداستارىنىڭ پىكىرى، ويى جازىلعان. ەڭ باستىسى فيلم ماسكەۋ تەاتر سىنشىلارىنىڭ «اشىربەك سىعاي كىم؟» دەگەن سۇراعىنا تولىعىمەن جاۋاپ بەرىلەدى»، - دەدى رەجيسسەر ح. وماروۆ.

«اشەكەڭنىڭ قازاسىنا تەاترعا جۇرت اعىلىپ كەلىپ جاتتى. مەن 77 جاسىمدا ەشقانداي اتاق-داڭق، ماراپاتتىڭ حالىق ىقىلاسىنان، باعاسىنان ارتىق ەمەس ەكەنىن ءتۇسىندىم. اشىربەك شىنىندا دا حالىقتىڭ ۇلى ەكەن. اينالايىن اشەكەڭ قاسىمدا جۇرگەن دوس ءىنىم بولاتىن. مەنىڭ ومىردەن وتسە دە، سىرلاساتىن ەكى ادامىم بار، ءبىرى - شاكەن (ايمانوۆ) بولسا، ەكىنشى سىرلاساتىن ادامىم - اشىربەك»، - دەدى قازاقستان حالىق ءارتىسى ءاسانالى ءاشىموۆ.

جازۋشى دۋلات يسابەكوۆ تە ءوز سوزىندە اشىربەكتىڭ ورنى قازاق ونەرىندە ويسىراپ تۇرعاندىعىن جەتكىزدى.

«بايگەنىڭ اتى بايگەگە يەسىز جەتىپ وتىر. ءوزىنىڭ 70 جىلدىق مەرەيتويىنا جەتە المايتىنىن بىلگەندەي ەل ارالاپ، وقىعان مەكتەبىندە بولىپ، بالالارمەن قاۋىشىپ، جاقىن دوستارىنا تەلەفون سوققان ەدى. ءىشى سەزدى مە ەكەن؟ اشىربەك سىعايدىڭ ورنى استە تولمايدى. حالىقارالىق شارالارعا ءتوراعالىققا كىم بارادى دەسەك، ەندى ويلانىپ، تارازىعا سالاتىن بولدىق. ەل ىشىندە ونىڭ ورنىن باسار تالانتتار تۋار دەپ كوڭىل جۇباتامىز»، - دەدى د. يسابەكوۆ.

سونداي-اق سىنشى تۋرالى دەرەكتى فيلمنىڭ تانىستىرىلىمى ونەر قايراتكەرىنىڭ تۋعان جەرىندە، 8 - قاڭتاردا شىمكەنتتە جانە 9 - قاڭتاردا كەنتاۋدا وتپەك.

اۆتور: گۇلميرا عوسمانالي