قازاقستان، ازەربايجان جانە رەسەيدىڭ اسكەري تەڭىز كۇشتەرى كاسپيدە وقۋ- جاتتىعۋ جيىنىن وتكىزەدى

استانا. قازاقپارات - قازاقستان مەن ازەربايجاننىڭ اسكەري- تەڭىز كۇشتەرى كاسپي فلوتيلياسىندا وقۋ- جاتتىعۋ وتكىزەدى. بۇعان رەسەيدىڭ اسكەري- تەڭىز فلوتىنىڭ شاعىن ارتيللەريالى جانە ەكى شاعىن زىمىراندى جاڭا اسكەري كەمەلەرى دە قاتىسۋعا نيەتتى، دەپ حابارلايدى ر ي ا- نوۆوستي اقپارات اگەنتتىگى.

 ر ف وڭتۇستىك اسكەري وكرۋگىنىڭ باسپا ءسوز قىزمەتى تاراتقان مالىمەتتەرگە قاراعاندا، كاسپي فلوتيلياسىنىڭ اسكەري تەڭىزشىلەرى 2015 - جىلى ءۇشجاقتى تەڭىزدەگى حالىقارالىق وقۋ- جاتتىعۋىن وتكىزۋدى جوسپارلايدى.

 كاسپي ماڭى مەملەكەتتەرى مۇنداي ءۇشجاقتى بىرلەسكەن اسكەري- تەڭىز كۇشتەرىنىڭ وقۋ- جاتتىعۋىن العاش رەت اعىمداعى جىلدىڭ شىلدە- ماۋسىم ايلارىنا قاراي تەڭىزدىڭ ورتا تۇسىنا تامان وتكىزۋدى قاراستىرادى. اتالعان شاراعا ر ف اسكەري تەڭىز فلوتىنان «ماحاچكالا»، «گراد سۆياجسك» جانە «ۋگليچ» اتتى شاعىن قۇرامداعى ارتيللەريالىق، قىسقا قاشىقتىقتاعى زىمىراندىق كەمەلەرى قاتىستىرىلماق.

 «بىرلەسكەن ارەكەتتەر بارىسىندا ءۇش تاراپتىڭ اسكەري- تەڭىز كۇشتەرىنىڭ وتريادى تەڭىز كوممۋنيكاتسيالارىن، تەڭىز ەكونوميكالىق قىزمەتتەرىن قورعاۋ، سونىڭ ىشىندە بىرلەسە مانيەۆرلەر جاساۋ، تەڭىزدەگى، اۋەدەگى جانە جاعالاۋداعى نىساندارعا ارتيللەريالىق سوققى بەرۋدىڭ اسكەري قيمىلدارىن ورىنداۋ ەلەمەنتتەرىن جۇزەگە اسىرادى. اسكەري ۇرىستىق جاتتىعۋلاردان بولەك، كەمە ەكيپاجدارى ىزدەۋ- قۇتقارۋ جۇمىستارىن قامتاماسىز ەتۋ، اپاتقا ۇشىراعان تەڭىز كەمەسىنە كومەك كورسەتۋ سەكىلدى جاتتىعۋلاردى دا بىرلەسە ورىندايدى» ، - دەلىنگەن باسپا ءسوز بايانىندا.