رۋبلدىڭ قۇنسىزدانۋى قىتايلىق ساۋداگەرلەرگە كەرى اسەرىن تيگىزۋدە

استانا. قازاقپارات - رۋبلدىڭ قۇنسىزدانۋى رەسەيگە عانا ەمەس، قىتايدىڭ كەيبىر قالالارىنا دا وڭاي ءتيىپ تۇرعان جوق.

ادەتتە ساۋداسى قىزىپ، تۋريزمنەن تابىس تاباتىن شەكارالاس ورنالاسقان سۋيفەنحە قالاسىنداعى ساۋدا ۇيلەرىندە قازىر ادام قاراسى از.

كاسىپكەرلەر دە بۇل جاعدايدان شىعۋدىڭ جان-جاقتى جولدارىن قاراستىرۋدا. رەسەي ساۋداگەرلەرى مەن تۋريستەرى كوپ كەلەتىن سۋيفەنحە قالاسى بۇگىندە بوس قالدى. ۇلكەن سۋپەرماركەتتەردە ساۋداگەرلەردەن باسقا ەشكىم جوق.

مىسالى، 7 قاباتتى 3 مىڭ شارشى مەتر جەردى الىپ جاتقان «قار پاتشالىعى» ساۋدا ۇيىندەگى بۋتيكتەر قاڭىراپ تۇر. قۇندىز تون ساتاتىن كاسىپكەر وتكەن ايدا ساۋداسىنىڭ %70-80 عا دەيىن قىسقارعانىن ايتادى.

رەسەيلىكتەرگە جەمىس-جيدەك وتكىزەتىن قىتايلىقتاردىڭ دا جاعدايى ءماز ەمەس. قاراشا ايىنان بەرى تاپسىرىس كۇرت ازايىپ كەتتى. سۋيفەنحە قىتايدا يۋانمەن بىرگە رۋبل دە جۇرەتىن جالعىز قالا. بىلتىر بەيجىڭ بيلىگى بۇل تاجىريبەنى ەنگىزگەندە، رۋبلدىڭ مۇنشالىقتى مۇشكىل جاعدايعا تۇسەتىنىن ەشكىم بىلگەن جوق. قىتايلىق كاسىپكەرلەر رەسەيلىك اقشامەن ەسەپ ايىرىسسا دا رۋبلدى كوپ ساقتاماۋعا تىرىسادى.

دەگەنمەن رەسەيلىك ۆاليۋتانىڭ قۇنسىزدانۋى كەيبىر كاسىپكەرلەرگە جاڭا مۇمكىندىك اشتى. مىسالى، قىتاي تاۋارلارىن كورشى ەلدەن ساتىپ الۋ ارزانعا تۇسەدى. رەسەيلىك زاتتارعا رۋبلمەن تولەگەندەر اقشاسىن ۇنەمدەپ، پايداعا دا كەنەلۋدە.

www.24.kz