تۇركيانىڭ ادانا قالاسىندا «قازاقستان» كوشەسى پايدا بولماق

استانا. قازاقپارات - باۋىرلاس مەملەكەت قازاقستان مەن تۇركيانىڭ ىنتىماقتاستىعى سان سالانى قامتيدى.

بۇگىندە ەكىجاقتى تىعىز بايلانىس تەك مەملەكەت باسشىلارى دەڭگەيىندە عانا ەمەس، قاراشا حالىقتىڭ اراسىندا دا ءوزارا دوستىق پەن تۋىستىقتىڭ جارقىن كورىنىسىن بەرۋدە.

مىسالى ادانا قالاسىنىڭ تۇرعىندارى بۇكىل حالقىمىزدى جاڭا جىل مەرەكەسىمەن قۇتتىقتاپ، بيىل قارايسالى اۋدانىنداعى ورتالىق كوشەنىڭ بىرىنە «قازاقستان» اتاۋى بەرىلەتىنىن ايتىپ، ءدۇيىم جۇرتتى ءبىر قۋانتتى.

ەكى جارىم ميلليون حالقى بار ادانا - تۇركيانىڭ وڭتۇستىگىندەگى اگرارلىق شارۋاشىلىعى دامىعان الىپ شاھار. ال ونىڭ قارايسالى اۋدانى -  كۇنىنە مىڭنان اسا ساياحاتشى قابىلدايتىن تۋريستىك ورتالىقتاردىڭ ءبىرى.

اۋداننىڭ قاق ورتاسىندا تاريحتا تۇركى حالىقتارى قۇرعان 16 ءىرى مەملەكەت پەن ونىڭ نەگىزىن قالاۋشى كورنەكتى تۇلعالاردىڭ مۇسىندەرى قويىلعان ساياباق بار. مىنە وسى ءىشى تاريحقا تۇنعان ساياباققا اكەلەتىن كوشەگە «قازاقستان» اتاۋى بەرىلمەك.

ال اۋدان مەرى ساادەتتين اسلان جەرگىلىكتى ءماسليحاتقا ءتيىستى ۇسىنىستار جاسالعانىن جەتكىزدى.

ساادەتتين اسلان، قارايسالى اۋدانىنىڭ مەرى:

- كوشە اتاۋىنا بايلانىستى ۇسىنىسىمىزدى ءماسليحات ءبىر اۋىزدان قولدايتىنىنا كامىل سەنىمدىمىن. ويتكەنى قازاقستانعا اتقارۋشى بيلىكتىڭ پارتياسى مەن بىرگە وپپوزيتسيالىق پارتيالار دا وڭ قاباق تانىتادى. البەتتە، ءبىز بارلىعىمىز تۋىسقان قازاقستانمەن قارىم-قاتىناسىمىزدى نىعايتۋدى كوزدەيمىز. بۇل كوشە ارامىزداعى مادەني، تۋريستىك جانە ىسكەرلىك بايلانىستارعا مول مۇمكىندىك اشاتىن قۇتتى جول بولادى دەپ ويلايمىن.

تۇركياداعى تانىمال اكتەر، قانداسىمىز باحادىر حاكىم جاعىمدى جاڭالىقتى ەستي سالىسىمەن، جەرگىلىكتى تۇرعىندارمەن جۇزدەسىپ، اۋدان مەرىنە قازاقى ءداستۇر بويىنشا شاپان جاۋىپ، قولىنا كوك بايراعىمىزدى ۇستاتتى. ال جاستار ۇيىمدارىنىڭ بەلسەندىلەرى سىيعا بەرىلگەن تۋىمىزدى بيىكتە جەلبىرەتۋ ءۇشىن قاپىقايا شاتقالىنا شىقتى.

جەتى جارىم مىڭ مەترگە سوزىلىپ جاتقان شاتقال -  اۋداننىڭ ەڭ كورىكتى مەكەنى.

جاستار ۇيىمىنىڭ كوشباسشىسى مەحمەتتيمۋر سەچتي: «قاپىقايانىڭ تابيعاتىن تاماشالاۋعا بيىل جازعى لاگەرگە قازاقستاندىق جاستاردى دا قۇشاق جايىپ قارسى الامىز»، - دەيدى.

مەحمەتتيمۋر سەچتي، جاستار ۇيىمىنىڭ كوشباسشىسى:

- تۇركىتىلدەس مەملەكەتتەردىڭ اراسىندا قازاقستاننىڭ ورنى ءبىز ءۇشىن ايرىقشا. اۋدانىمىزدا كوشە اتاۋى ارنايى بەرىلىپ جاتسا، سىزدەرگە دەگەن ىستىق ىقىلاسىمىزدىڭ ءبىر بولشەگى دەپ قابىل الىڭىزدار. وسى رەتتە بۇكىل قازاقستان حالقىن جاڭا جىل مەيرامىمەن قۇتتىقتاپ، ەلگە بەيبىتشىلىك پەن تاتۋلىق تىلەيمىن.

ىستامبۇل مەن ءمادينا قالاسىن جالعايتىن تەمىرجول قارايسالى اۋدانىن كەسىپ وتەدى. 1912 -جىلى قولدانىسقا بەرىلگەن المان كوپىرى ءبىر عاسىردان استام قوس قالانىڭ قاتىناسىنا جان ءبىتىرىپ تۇر. باۋىرلاس قازاق-تۇرىك بايلانىسى دا عاسىرلارعا ۇلاسسىن دەگەن ويمەن ەكى ەلدىڭ تۋلارى تاريحي كوپىردىڭ بويىنا جايىلدى.

www.24.kz