قازاقستاندىق سۋرەتشى بالالارعا ارنالعان جاڭا الىپپە جاسادى
اڭساعان مۇستافا جاڭا الىپپەنىڭ سەنسور ەكرانى بار گادجەتتەرگە جۇكتەلەتىن قوسىمشا بولىپ شىعاتىنىن ايتتى. ونى IT- مامان تيمۋر بەكتۇر جاساپ شىعۋعا كەلىسىم بەرگەن. اڭساعان مۇستافا ءوز ماقساتىنىڭ قازاق بالالارىنا قازاقشا ۇيرەتۋ، قازاقشا ءتىل اشۋ، قازاقشا ويلاتۋ ەكەنىن ايتادى. «قازىر ەلدىڭ ءبارى ينتەرنەتتە، كىتاپتى ەشكىم كوپ قارامايدى، سوندىقتان iPad, iPhone-دارمەن ويىن وينايدى. ال ەگەر ۇيالى تەلەفوندا قازاقشا دۇنيە بولسا امالسىز ۇيرەنەدى. جالپى الەمدە مۇنداي دۇنيەلەر الەم تىلدەرىندە كوپ، قازاق ءتىلىمىز دە ەلدەن قالماسىن دەگەن نيەتپەن جاساپ وتىرمىز»، - دەيدى مۇستافا. سونىمەن قاتار، سۋرەتشى بۇل جوبانى بالالارعا ارنالعان وتاندىق تەلەارناعا تەگىن بەرگىسى كەلەتىنىن ايتتى.
سمارتفوندارعا ارنالعان قوسىمشادا الىپپەنى ۇيرەنۋگە باۋليتىن ءان بولادى:
«بار ءبىلىمنىڭ باستاۋى تەك - ارىپتەر،
بارلىق ادام ءبىلىمدىنى دارىپتەر.
ءالىپبيدى ۇيرەنەيىك، قانە، ءبىز،
مەنىمەنەن وسى انگە سالىپ كور.
ا، ءا، ب، ۆ، گ، ع، د، ە، ج، ز، ي،
قىسقا ي-دى تاعى ەسىڭە الىپ قوي.
ك، ق، ل، م، ن، ڭ، و، ءو، پ، ر، س،
جاتتاپ الىپ، قاپشىعىڭا سالىپ قوي.
سانامىزعا ارىپتەردى توقيمىز،
كىتاپتاردى سۋدىراتىپ وقيمىز.
وتانىمنىڭ سامعاۋ ءۇشىن كوگىندە
شالقار ءبىلىم تەڭىزىندە تاسيمىز.
ت، ۋ، ۇ، ءۇ، ف، ح، س، چ، ش، ى، ءى،
كەلدى وسىلاي ءالىپبيدىڭ ۇيقاسى.
ە، يۋ، يا- مەن اۋەلەتەم ءانىمدى،
قاعىپ الىپ، تاۋ-تاسىم دا شىرقاسىن».
بالالارعا ارنالعان جاڭا الىپپەنىڭ ءسوزىن جۋرناليست ءمادينا دۇيسەكەيەۆا جازدى. بۇل سوزگە ءان دە جازىلعان، ونىڭ اۆتورى - كومپوزيتور - رينات ءابدىحالىقوۆ. ونى وپەرا ءانشىسى سارا نايمان ورىنداماقشى. «مەن دە بۇل يدەيامەن قازاقشا الىپپە مۋلتفيلمىن جاساعىم كەلەدى. بالالار وتە تەز ۇيرەنەدى، ال مۋلتفيلم مەن ءان ارقىلى جىلدام مەڭگەرەدى. مەنىڭ بالام ەكى جاسىندا اعىلشىن جانە نەمىس الىپپەلەرىن ەكى جاسىندا-اق ءبىلىپ الدى»، - دەيدى سارا نايمان.
ءوز كەزەگىندە IT- مامان تيمۋر بەكتۇر جاسالماعان دۇنيەگە الدىن الا پىكىر ايتۋ ەرتە ەكەنىن، بۇعان دەيىن دە قازاقشا الىپپەلەردىڭ قوسىمشالارى شىققانىن ايتادى. «تەك ءبىر وي بار - الىپپەنى وسى سۋرەتتەر نەگىزىندە 2-3 جانە 4-5 جاستاعى بالالارعا ەكى بولەك نۇسقادا دايىنداۋ. مۇنىمەن قاتار، ءبىر ەرەكشەلىگى الىپپەنىڭ تاقپاقپەن بەرىلەتىنىندە»، - دەيدى تيمۋر بەكتۇر.
