دۋلات يسابەكوۆتىڭ «ءبىز سوعىستى كورگەن جوقپىز» اتتى پوۆەسى اعىلشىن تىلىندە جارىق كورەدى
بۇل تۋرالى قازاقپارات تىلشىسىنە جازۋشىنىڭ ءوزى ءمالىم ەتتى.
ەستەرىڭىزگە سالا كەتەلىك، دۋلات يسابەكوۆ وتكەن جىلى شىڭعىس ايتماتوۆ اتىنداعى حالىقارالىق سىيلىقتىڭ لاۋرەاتى اتانعان بولاتىن. ماراپاتتاۋ ءراسىمى 12 - جەلتوقسان كۇنى لوندون قالاسىندا ءوتتى. وسى ساپار بارىسىندا اتالمىش شارانى ۇيىمداستىرۋشى - لوندونداعى شىڭعىس ايتماتوۆ اكادەمياسىنىڭ پرەزيدەنتى، پروفەسسور راحيما ابدۋاليەۆا جانە باسقا دا مۇددەلى تۇلعالار جازۋشىمەن كەزدەسىپ، الداعى 2015 - جىلدىڭ جوسپارىمەن بولىسكەن ەكەن.
«بۇعان دەيىن «گاۋحارتاس» اتتى اڭگىمەلەر مەن پوۆەستەر جيناعىم تۇڭعىش رەت اعىلشىن تىلىندە جارىق كورگەن ەدى. ونىڭ تۇساۋكەسەرى ءساۋىر ايىندا كەمبريدج ۋنيۆەرسيتەتىندە ءوتتى. ەندى مىنە، «ءبىز سوعىستى كورگەن جوقپىز» اتتى پوۆەسىم دە اۋدارىلىپ جاتىر ەكەن. «اياقتالىپ قالدى» - دەيدى. دەگەنمەن، تاقىرىبى اعىلشىندارعا كەلىڭكىرەمەيدى ەكەن. ەندى، «ۇلى وتان سوعىسى»، «ەكىنشى دۇنيەجۇزىلىك سوعىس» دەگەن ۇعىمداردى اعىلشىندار باسقاشا قابىلدايدى عوي. ال قازىر بۇكىل الەمدە «سوعىس جانە بالالار» اتتى ۇلكەن جوبا ءجۇرىپ جاتىر. سوندىقتان، ۇيىمداستىرۋشىلار: «بۇل پوۆەستى اعىلشىن تىلىندە «سوعىس جانە بالالار» دەپ قويالىق، دەدى. مەن قولدادىم» - دەيدى د. يسابەكوۆ.
سونىمەن قاتار، جازۋشى الداعى ناۋرىز ايىندا ءوزىنىڭ «وكپەك جولاۋشى» اتتى پەساسىن نارتاي بەكەجانوۆ اتىنداعى قىزىلوردا وبلىستىق اكادەميالىق مۋزىكالىق- دراما تەاترى لوندون قالاسىندا قازاق تىلىندە قوياتىندىعىن جەتكىزدى.
«وتكەن قىركۇيەك ايىندا استانادا قازاقستان حالىقتارىنىڭ فەستيۆالى ءوتىپ ەدى عوي. سوندا قىزىلوردالىق تەاتر وسى پەسانى قويدى. ال بۇل، اراسىندا لوردتار پالاتاسىنىڭ وكىلدەرى بار اعىلشىندىق دەلەگاتسياعا قاتتى ۇناپتى. سولار وسى تەاتردى الداعى ناۋرىز ايىندا لوندون قالاسىنا شاقىرىپ وتىر» - دەدى د. يسابەكوۆ.
ايتا كەتەلىك، دۋلات يسابەكوۆتىڭ بۇل پەساسى «The Transit Passenger» دەگەن اتپەن وتكەن جىلى ءساۋىر ايىندا لوندون قالاسىنىڭ «Giant Olive» تەاترىندا اعىلشىن تىلىندە قويىلعان بولاتىن. ال بيىل، جازۋشىنىڭ «ەسكەرتكىش وپەراتسياسى» اتتى كومەديالىق قويىلىمى دا لوندوندا اعىلشىن تىلىنە ساحنالانادى دەپ كۇتىلۋدە.
اۆتور: جاپپاربەرگەن ايبوتا
