08:05, 03 - قاڭتار 2015 | GMT +5
قازاقستاندىق شاباندوزدار توپ جاردى
استانا. قازاقپارات - سولتۇستىك افريكادا باستالعان رالليدە جەرلەستەرىمىز توپ جاردى.
ي. سازونوۆ پەن ارسلان ساحيموۆ تىزگىندەگەن جول تالعامايتىن كولىك جالپى ەسەپتە كوش باستادى، دەپ حابارلادى «حابار» تەلەارناسى.
شاباندوزدار ماروككو، ماۆريتانيا جانە سەنەگال ەلدەرىنىڭ جولدارىمەن جۇيتكىدى. جالپى بۇل جارىسقا قازاقستاننان ءتورت ەكيپاج قاتىستى. ماروككونىڭ تانگۋنيت جانە اسسا قالالارىنىڭ اراسىنداعى 433 شاقىرىمعا سوزىلعان قاشىقتىقتى سازونوۆ پەن ساحيموۆ ءتورتىنشى بولىپ ەڭسەردى.
الدىڭعى ەكى كەزەڭدە دە شاباندوزدار قارسىلاستارىن شاڭ قاپتىرعان ەدى. سوندىقتان جالپى ەسەپتە ولار 1-ورىنعا لايىق بولدى.
«افريكا ەكو رەيس-2015» سايىسىنىڭ ءۇشىنشى كەزەڭىنىڭ قورىتىندىسى بويىنشا، ەلىمىزدەن بارعان قانات شاعىروۆ پەن اندرەي چەرەدنيكوۆ تا العاشقى وندىقتان كورىندى.
