قازاقستاندا تۇرعىن ءۇي قۇرىلىسىنىڭ جاڭا باعدارلاماسى بويىنشا قۇرىلىس جۇمىستارى باستالادى
بۇل تۋرالى مۇنىڭ الدىندا «قازاقستان-2050» دەموكراتيالىق كۇشتەردىڭ جالپى ۇلتتىق كواليتسياسىنىڭ وتىرىسىندا ق ر پرەمەر-ءمينيسترىنىڭ ءبىرىنشى ورىنباسارى باقىتجان ساعىنتايەۆ ءمالىم ەتكەن بولاتىن.
بيىل ۆيتسە-پرەمەرلىك قىزمەت مەرزىمى اياقتالعان ب. ساعىنتايەۆ: «قازىرگى ۋاقىتتا ءبىز تۇرعىن ءۇي سالۋدىڭ جاڭا مەحانيزمدەرىن ازىرلەۋدەمىز. باعدارلاماعا سايكەسىنشە وزگەرتۋلەر جەلتوقسان ايىندا ەنگىزىلەدى. ال 2015-جىلدىڭ 1- قاڭتارىنان ەلىمىزدىڭ بارلىق وڭىرلەرىندە جاڭا تۇرعىن ءۇي باعدارلاماسى بويىنشا ۇيلەردىڭ قۇرىلىسى باستالادى»، - دەگەن بولاتىن.
ب. ساعىنتايەۆتىڭ اتاپ وتكەنىندەي، جالدامالى تۇرعىن ءۇي قۇرىلىسى جۇرگىزىلەتىن اۋداندارعا ينجەنەرلىك جەلىلەر تارتۋعا جانە قۇرىلىستى جوبالاۋعا 35 ميلليارد تەڭگە بولىنەدى. سونىمەن قاتار جالدامالى تۇرعىن ءۇي قۇرىلىسى ءۇشىن «بايتەرەك» حولدينگىنە 0,1 پايىزدىق ستاۆكامەن 30 جىلعا 145 ميلليارد تەڭگە ءبولۋ جوسپارلانىپ وتىر. جالدامالى تۇرعىن ءۇي قۇرىلىسى باعدارلاماسىنىڭ وپەراتورى «قازاقستاننىڭ يپوتەكالىق كومپانياسى» ا ق بولادى. قوسىمشا 1 ميلليون شارشى مەتر تۇرعىن ءۇي سالىنادى.
تۇرعىن ءۇي قۇرىلىسىنا ۇلتتىق قوردان بولىنەتىن 145 ميلليارد تەڭگەدەن بولەك تە قارجى قاراستىرىلادى. اتاپ ايتقاندا، 2013-2014-جىلدارعا ارنالعان «قولجەتىمدى باسپانا-2020» باعدارلاماسىنا 29 ميلليارد تەڭگەدەن استام قارجى بولىنگەن بولسا، قازاقستاننىڭ يپوتەكالىق كومپانياسى قور نارىعىندا 2017-2019-جىلدارعا ارنالعان 50 ميلليارد تەڭگە سوماسىنداعى وبليگاتسيالاردى ورنالاستىرادى. بۇدان بولەك، باسقا دا قارجى كوزدەرىنەن باسپانا قۇرىلىسىنا 25,8 ميلليارد تەڭگە تارتىلادى.
ناتيجەسىندە، تۇرعىن ءۇي قۇرىلىسىنا سالىناتىن قارجىنىڭ جالپى كولەمى 250 ميلليارد تەڭگەنى قۇرايدى. دايىن ۇيلەر جاڭا تۇرعىن ءۇي قۇرىلىسى باعدارلاماسى ارقىلى بەرىلۋى مۇمكىن.
اۆتور: جاسۇلان جولدىبايەۆ
