گۇلناز نۇربالينا، ءانشى: دەرتىمە شيپا بولعان - ءان
ونەردىڭ كيەسىن ەرەكشە جان- تانىمەن سەزىنەتىن وسىنداي انشىلەردىڭ ءبىرى گۇلناز نۇربالينا. سوڭعى 15-16 -جىلدان بەرى ساحنادان الىستاپ كەتكەن ءداستۇرلى ءانشى تاياۋدا ونەر اۋىلىنا قايتا ورالدى. ءان ورىنداعاندا داۋىسىنان ناعىز قازاقىلىقتىڭ ءيىسى اڭقيتىن گۇلناز حانىم جاقىندا «الاش ايناسىنىڭ» رەداكتسياسىندا قوناقتا بولعان ەدى.
بىلتىر بەلگىلى سازگەر، پرديۋسەر ارمان دۇيسەنوۆتىڭ جەكە شىعارماشىلىق كەشى گۇلناز نۇربالينانىڭ ورىنداۋىنداعى «بارىڭدى باعالا» انىمەن اشىلعان بولاتىن. بۇل - گۇلنازدىڭ اراعا ۇزاق جىلدار سالىپ، ۇلكەن ساحنادا العاش رەت ءان سالۋى. ءانشى ساحناعا شىعاردا ءوزىنىڭ قاتتى قوبالجىعانىن ايتادى. الايدا تۋما تالانت يەسى ساحناعا شىققاندا ءتىپتى ءوزىنىڭ سىرقاتىن دا ۇمىتىپ، جان- تانىمەن بەرىلىپ ءان سالىپ، حالىقتىڭ قوشەمەتىنە بولەنىپ، ءوزىنىڭ ونەر ءۇشىن جارالعان جان ەكەنىنە كوز جەتكىزدى.
گۇلناز نۇربالينا ۇلكەن ساحناعا بالا كەزىندە- اق شىققان. ونەرلى وتباسىندا دۇنيەگە كەلگەن گۇلناز اكەسىنىڭ دومبىرامەن سالعان اندەرىن تىڭداپ ءوستى. ول - وتباسىندعى ون بالانىڭ التىنشىسى. جاستايىنان قۇلاعىنا ءسىڭىستى بولعان حالىق اندەرى، دومبىرانىڭ ءۇنى گۇلنازدىڭ ونەر جولىن تاڭداۋىنا سەبەپ بولدى.
گۇلناز كوكشەتاۋ وبلىسى ءۋاليحانوۆ اۋدانىنا قاراستى قاراتال دەگەن اۋىلدا دۇنيەگە كەلگەن. ول 6-سىنىپقا دەيىن اۋىلدىڭ مەكتەبىندە وقىدى، 7- سىنىپتان باستاپ ۇلكەن اپكەسى ونى كوكشەتاۋ قالاسىنا الىپ كەلىپ، قالادا ءبىلىم الۋىنا جاعداي جاسادى. مەكتەپتە وقىپ جۇرگەندە اۋداندىق، وبلىستىق مادەني شارالاردا ءان سالىپ جۇرگەن دارىن يەسى وبلىس ورتالىعىندا اشىلعان فيلارمونيادا جۇمىس ىستەدى. دارىندى جاستىڭ ونەرى بىردە كوكشەتاۋ قالاسىنا ءىس ساپارمەن بارعان ەلباسىنىڭ كوڭىلىنەن شىعىپ، پرەزيدەنت گۇلنازدى الماتى قالاسىندا مۋزىكالىق ءبىلىم الۋعا شاقىرادى. گۇلناز ورتا مەكتەپتى بىتىرگەننەن كەيىن الماتى قالاسىنا كەلىپ، اباي اتىنداعى الماتى مەملەكەتتىك ۋنيۆەرسيتەتىنە وقۋعا ءتۇسىپ، مۋزىكالىق ءبىلىم الىپ شىعادى. ستۋدەنت كەزىندە دە بەلسەندى بولعان گۇلناز ءبىراز ۋاقىت «گۇلدەر» انسامبلىندە قىزمەت اتقاردى. سول كەزدەرلە كوپتەگەن مادەني شارالار، سالتاناتتى كەشتەر، كونتسەرتتەر گۇلنازدىڭ ورىنداۋىنداعى اندەرمەن اشىلاتىن. قايناعان ونەردىڭ ورتاسىنان گۇلناز تۇرمىس قۇرعاننان كەيىن ءبىراز اجىراپ قالدى. گۇلناز وتباسىن قۇرعاننان كەيىن ءوزىنىڭ بار نازارىن جارىنا، بالالارىنا ارنادى. اياۋلى جار، قامقور انا، يبالى كەلىن وتباسىنىڭ باقىتىن بارىنەن جوعارى قويدى.
گۇلناز نۇربالينا، ءانشى: - تۇرمىس قۇرعاننان كەيىن مەن ءۇشىن جارىم مەن بالالارىم بارىنەن ماڭىزدى بولدى. ونىڭ ۇستىنە سوڭعى 5-6 جىل ءوزىم قاتتى ناۋقاستانىپ قالدىم. توقتامايتىن جوتەل پايدا بولىپ، دارىگەرلەردىڭ قويعان ءتۇرلى دياگنوزى دا ابدەن كۇيزەلتتى. وسى سىرقاتتان ايىعۋىما، باس كوتەرىپ، قايتا ءوزىمدى ونەردەن تابۋىما سەبەپكەر بولعان جان - مەنىڭ جولداسىم ءىنىجان. ومىرلىك سەرىگىم ءىنىجان مەنىڭ ونەرىمە ەشقاشان قارسىلىق بىلىدىرگەن ەمەس، قايتا ول ماعان قاشاندا قولداۋ كورسەتىپ، ءاندى تاستاماۋىمدى وتىنەتىن. بىردە قاتتى اۋىرىپ، جوتەلىپ اسقىنىپ وتىرعان كەزدە ول ماعان ەلباسى سىيعا تارتقان دومبىرامدى قولىما ۇستاتىپ، ءان ايتشى، مەنى وزىڭە عاشىق ەتكەن ءانىڭدى ورىنداشى دەپ قيىلدى. ءان ايتقىم كەلمەسە دە، ءتىپتى دومبىراعا قاراعىم كەلمەسە دە جولداسىمنىڭ كوڭىلىن قيماي، «باياناۋىل» ءانىن ىڭىلداپ ورىندادىم، اراسىندا جوتەلىپ قويامىن. ءبىراق ءان ايتقاندا جوتەلىمنىڭ ءبىراز سايابىرلاعانىن كورگەن ءىنىجان: «مەن سەنىڭ اۋرۋىڭنىڭ ەمىن تاپتىم، ماعان ءان ايتۋ كەرەك، ساحناعا شىعۋ كەرەك» دەدى. ءسويتىپ ءبىر كۇنى قولىمنان جەتەكتەپ ارمان دۇيسەنوۆكە ەرتىپ اكەلدى. الدىن الا كەزدەسۋگە كەلىسىپ، ارمانعا ءمان- جايدى ءتۇسىندىرىپ، مەنىڭ ورىنداۋىمداعى ءاندى تىڭداپ كورۋىن وتىنگەن ەكەن. ارمان مەنىڭ ءانىمدى تىڭداپ كوردى دە: «جەڭەشە، مىنانداي داۋىسپەن سىزگە ساحنادا ءان ايتۋ كەرەك» دەپ ءوزىنىڭ رينات زايىتوۆتىڭ سوزىنە جازىلعان «بارىڭدى باعالا» ءانىن تىڭداتتى. ءان ماعان بىردەن ۇنادى. ءان مەنىڭ بولمىسىما ساي، مەنىڭ ومىرىمە ارناپ جازىلعانداي اسەر الدىم. وسى ءاندى ايتىپ ءبىراز ۋاقىت دايىندالىپ جۇرگەنىمدە ارمان حابارلاسىپ، ءوزىنىڭ كەشىن وسى انمەن اشاتىنىن ايتقاندا قاتتى قوبالجىدىم. مەن ءۇشىن سونشا جىلدان كەيىن ءبىرىنشى بولىپ ساحناعا شىعۋ، ءان ورىنداۋ دەگەن وتە قيىن بولدى. 16-17 جاسىمدا ساحنادان قورىقپاي، جىگەرمەن شىعاتىن بولسام، جاسىم قىرىققا تاياعاندا ءوزىمدى العاش رەت ساحناعا شىعاتىنداي سەزىندىم. ءبىراق وسىدان كەيىن كيەلى ساحنانىڭ قاسيەتى بولار مەن ءتىپتى ءوزىمنىڭ سىرقاتىمدى ۇمىتىپ، اۋرۋىمنان ايىعىپ كەتتىم.
ءوزىن ونەردەن قايتا تاپقان گۇلناز سوڭعى ءبىر جىلدا قازىرگى شوۋ- بيزنەستىڭ كوشىنە ىلەسۋگە تىرىسىپ باعۋدا. ءانشى بۇگىندە بىرنەشە حالىق اندەرىن، ەسترادالىق اندەردى، تويعا ارنالعان اندەردى جازدىرىپ، ساحنادا، توي- تومالاقتاردا ورىنداپ ءجۇر. گۇلنازدىڭ ورىنداۋىنداعى «قىزعا تىلەك» ، «قۇدالار» دەگەن اندەرىن، ءانشىنىڭ تابيعاتىن اشاتىن «بۇلدىرگەن» ، «جانايكەرىم» سەكىلدى حالىق اندەرىن كوپشىلىك جاقسى قابىلداۋدا. ءانشىنىڭ ايتۋىنشا، ول ءوزىنىڭ رەپەرتۋارىن، ەسترادالىق اندەرىنىڭ وڭدەلۋىن ارمان دۇيسەنوۆپەن كەڭەسىپ وتىرادى. ال ازىرگە ءانشىنىڭ پروديۋسەرى دە، قارجى جاعىنان قولداۋشىسى دا ءوزىنىڭ جولداسى - ءىنىجان. دارىندى انشىگە ونەردە جۇلدىزىڭىز جارقىراي بەرسىن دەگىمىز كەلەدى.
«الاش ايناسى»
