ا ق ش پەن كۋبا اراسىنداعى قارىم-قاتىناس راسىندا دا جاقسارا ما؟

استانا. قازاقپارات - ا ق ش- تىڭ ىشكى احۋالى سۋىق تيگەن ادامنىڭ كەيپىنە ءتۇسىپ، ىزعارلانىپ تۇرعاندا، سىرتقى ساياساتىندا جىلىمىق پايدا بولدى.

جارتى عاسىر بۇرىن ات قۇيرىعىن كەسكەن كۋبامەن ارا-قاتىناسى جاقسارىپ، ءسۇيىنشى سۇرايتىن جاعدايعا جەتتى. قىرعي-قاباق بولىپ كەلگەن ەلدەردىڭ باسشىلارى اراعا 50 جىل سالىپ العاش رەت تەلەفون ارقىلى بايلانىسقا شىعىپ، ورتاق اڭگىمە ايتتى.

بۇل تىلدەسۋدىڭ سوڭى ءوزارا تۇتقىنداردى الماستىرۋعا ۇلاسىپ، اق ءۇي ءبىر كەزدە «بوستاندىق ارالىنا» سالىنعان ەكونوميكالىق سانكتسيالاردى الىپ تاستاۋعا ءسوز بەردى. ءوتىپ بارا جاتقان جىلدىڭ باستى جاعىمدى ساياسي جاڭالىقتارىنىڭ ءبىرى تۋرالى شەتەلدىك شولۋشىمىز گۇلجازيرا ءابىلوۆا اڭگىمەلەيدى.

جەلتوقساننىڭ ورتا شەنىندە ا ق ش «بوستاندىق ارالىمەن» ۇزىلگەن بايلانىسىن قايتا جالعاستىردى. بۇل جايتتىڭ بۇكىل الەم ءۇشىن كۇتپەگەن جاڭالىق بولعانى ءسوزسىز.

سونداي-اق جۋىردا گاۆانادا ا ق ش-تىڭ ەلشىلىگى اشىلۋى مۇمكىن. ال ەڭ باستىسى، جارتى عاسىردان بەرى اق ءۇيدىڭ كۋباعا سالىپ كەلگەن ەكونوميكالىق سانكتسيالارى الىنىپ تاستالماق. باراك وباما، ا ق ش پرەزيدەنتى:

- كۋبانى وسىدان جارتى عاسىر بۇرىن بيلىككە كەلگەن كاسترولار باسقارۋدا. جانە ول جەردە كوممۋنيستىك رەجيم ورناتىلعان. ال ا ق ش پەن كۋبا ۇكىمەتتەرىنىڭ سوڭعى جارتى عاسىر بويى ۇستانعان ساياساتى ەكى ەلدىڭ ەتەنە ارالاسۋىنا ەشبىر مۇمكىندىك بەرگەن جوق.

ەندى ءبىز قارىم- قاتىناسىمىزدى قايتا قاراستىرۋ بارىسىندا وسى ساياساتتى تۇبەگەيلى وزگەرتەمىز. بۇل ەلگە قاتىستى قويىلعان ەكونوميكالىق شەكتەۋلەر الىپ تاستالىپ، ا ق ش پەن كۋبا ءوزارا بايلانىستارىن قارقىندى تۇردە دامىتاتىن بولادى.

ارتىنشا تاراپتار ءوز جەرلەرىندەگى تۇتقىنداردى بوساتتى.

وسىدان 5 -جىل بۇرىن كۋبا جەرىندە قامالعان امەريكالىق الان گروسس ا ق ش- قا ورالىپ، فلوريدا شتاتىندا تىڭشىلىقپەن اينالىستى دەگەن ايىپپەن ۇستالعان 5 كۋبالىق وتانىنا قايتارىلدى. بۇل قۋانىپ جاتقان -  كۋبا حالقى. ءبىراق اتالعان تاريحي وقيعاعا قاتىستى ءوز كوزقاراسىن بىلدىرمەگەن ءبىر ادام بار.

ول -  كۋبا ريەۆوليۋتسياسىنىڭ «اكەسى» فيدەل كاسترو. گاۆاناداعى كوشەلەر مەن داڭعىلدارعا ونىڭ سۋرەتتەرى ءىلىنىپ تاستالعان. ال فيدەل كاسترونىڭ ءوزى قايدا ەكەنى بەلگىسىز. ءتىپتى 88 جاستاعى كوماندانتەنىڭ جيەنى ونىڭ قازىرگى تىنىس-تىرشىلىگىنەن بەيحابار بولىپ شىقتى.

ماريەلا كاسترو، راۋل كاسترونىڭ قىزى:

- ءبىر نارسەنى عانا انىق ايتا الامىن -  فيدەل كاسترو كەز كەلگەن ساتتە باسىلىم بەتىندە مالىمدەمە جاساۋى مۇمكىن.

سونداي-اق كۋبا كوسەمى ۇلتتىق اسسامبلەيانىڭ باسقوسۋىنا قاتىسپاعان. الەمدىك باسىلىمدار ونىڭ ۇزاق جىلدار بويى ءوزىن دەندەگەن اۋرۋ تاۋقىمەتىن تارتىپ جۇرگەنىن جارىسا جازدى. ال فيدەل كاسترونىڭ اۋرۋى تۋرالى بۇل اقپارات كۋبا جەرىندە مەملەكەتتىك قۇپيا سانالادى.

24.kz