جاڭا جىلدى قارسى الۋ - ءار ەلدىڭ سالتى باسقا
ولار 25 - جەلتوقسان كۇنى وتباسى ورتاسىندا جايىلعان داستارحان باسىندا جينالادى. كىشكەنتاي بالالى ۇيلەر اياز اتانى شاقىرىپ، بوبەكتەرىنە قۋانىش سىيلايدى. گەرمانيادا ەسەككە مىنگەن سانتا-كلاۋس ءبىر ءتۇن ىشىندە جەر بەتىن ارالاپ شىعادى.
بۇل ەلدەگى ادەت بويىنشا اياز اتا سىيلىقتاردى وشاق قاسىندا ىلىنگەن شۇلىققا ەمەس، تەمىر ىدىسقا سالىپ كەتەدى. الدىن الا ريزاشىلىعىن بىلدىرگەن بالالار اياق كيىمدەرىنىڭ ىشىنە ەسەككە ارناپ ءشوپ سالىپ قويادى.
فرانسيادا جاڭا جىلمەن قۇتتىقتاۋ ءراسىمى بويىنشا ەرەسەكتەر تولىپ تۇرعان بوشكەگە بوكالىن سوعىستىرىپ، جاڭا جىلدا مولشىلىق، جاقسى ەگىن بولسىن دەگەن تىلەكپەن شاراپ ىشەدى.
ال بالالارعا سىيلىقتى فرانسۋز اياز اتاسى پەرنوەل اكەلىپ، كەبىستەرىنىڭ ىشىنە سالىپ كەتەدى. ال يتاليادا جاڭا جىلدى قارسى الۋ ماڭىزدى شارۋا.
ءاربىر ءۇيدىڭ داستارحانىندا جاڭعاق، ءجۇزىم، جاسىمىق بولۋعا ءتيىس. بۇل يتالياندىقتاردىڭ بۇلجىتپايتىن ءداستۇرى. يتالياندىقتار ءاربىر سىيلىققا ساتتىلىك پەن ىرىس-بەرەكە بەلگىسى بولىپ سانالاتىن ءبىر شولمەك بۇلاق سۋى مەن ءزايتۇن بۇتاعىن قوسىپ بەرەدى.
جاڭا جىل كەلگەندە يتالياندىقتار ەسكى نانىم بويىنشا جاڭا جىلدا تازارىپ، جاڭارۋ ءۇشىن تەرەزەدەن ەسكى زاتتار مەن ءۇي جيھازىن سىرتقا لاقتىرىپ تاستايدى. جاپوندىقتاردىڭ ۇيىندە مىندەتتى تۇردە تىرناۋىش بولۋعا ءتيىستى، تىرناۋىش بولماسا جاڭا جىل باستالمايدى دەگەن پىكىر قالىپتاسقان.
جاڭاجىلدىق تۇندە جاپوندىقتار ءبىر ادامداي قولدارىنا تىرناۋىش الىپ، جەر تىرناۋعا كىرىسەدى دەپ ويلاپ قالماڭىزدار. ولارعا تىرناۋىش باق-داۋلەتتى كۇرەپ، جيناۋ ءۇشىن كەرەك. قىتايلىقتار جاڭاجىلدىق مەرەكەنى 17-19 - قاڭتاردا اتاپ وتەدى.
بۇل شىعىس ەلىنىڭ تۇرعىندارى ءتۇرلى ءتۇستى پەتاردانى الىپ، جاپپاي فەيەرۆەرك ۇيىمداستىرۋى ەشكىمگە جاڭالىق ەمەس. ءبىزدى قىتايلىقتاردىڭ جاڭا جىلى ۇيىنە قامالىپ، تەرەزە مەن ەسىكتەرىن بەكىتىپ، قاعاز جابىستىرىپ تاستاۋى تاڭقالدىرادى.
ال نەپالدىڭ تۇرعىندارى جاڭاجىلدىق تۇندە ناعىز پيروتەحنيك شەبەرلەرىنە اينالادى. اتتاپ باسقان سايىن جارىلىپ، وت شاشىپ جاتقان پەتاردالار ازدىق ەتكەندەي، ءۇستى-بەتىن بوياپ العان نەپالدىقتار ەسكى زاتتار مەن ەسكى جىلداعى قايعى قاسىرەت پەن قيىندىقتاردان ارىلۋ ءۇشىن مىڭداعان وت جاعىپ قويادى.
