مەرۋەرت تۇسىپبايەۆا جىل جۇيرىگى
شىعارماشىلىق كەش وتكىزىپ، شاڭىراق كوتەرىپ، باسپانالى بولىپ، ەندى ءبىرى ءسابي ءسۇيدى. تاۋەلسىزدىك كۇنى قارساڭىندا مەملەكەتتىك ناگرادالار الىپ، مەرەيى وسكەندەر دە بار.
سولاردىڭ ءبىرى دە، بىرەگەيى ءانشى- اكتريسا، پەداگوگيكا عىلىمدارىنىڭ كانديداتى، ۇلاعاتتى ۇستاز مەرۋەرت تۇسىپبايەۆا قازاقستاننىڭ ەڭبەك سىڭىرگەن قايراتكەرى اتاندى.
ونەر يەسى وسىعان دەيىن مەملەكەتتىك «دارىن» جاستار سىيلىعى مەن مادەنيەت قايراتكەرى اتاعىن العان بولاتىن.
- مەنى بۇل قۇرمەتكە تۋعان ولكەم پاۆلودار وبلىسى ۇسىندى. ءبىراق ءتيىستى قۇجاتتاردى الماتىدان وتكىزدىم. ال سالتاناتتى ءراسىم كەرەكۋ جەرىندە جۇزەگە استى. تاۋەلسىزدىك كۇنىنە ورايلاستىرىلعان شارادا وبلىس اكىمى قانات بوزىمبايەۆ مىرزا ءوز قولىمەن تاپسىردى.
بۇل مەنىڭ 17 جىل ىشىندە ونەردىڭ وركەندەۋىنە قوسقان ۇلەسىمنىڭ ناتيجەسى دەپ بىلەمىن. پرەزيدەنت - ەل باسقارىپ وتىرعان تۇلعا.
ەندەشە، ەلباسىنىڭ قولى قويىلىپ، مەملەكەتتىڭ ءمورى باسىلعان كۋالىك - ماعان دەگەن ەلدىڭ قۇرمەتى، سەنىمى، ءۇمىتى دەپ تۇسىنەمىن. حالىق اراسىندا اتاقتى بولا تۇرا، ەلەۋسىز ءوتىپ جاتقان ازاماتتار بار.
سوندىقتان مۇنداي جوعارى ماراپاتتى العان دا ارماندا، الماعان دا ارماندا. اتاققۇمار ەمەسپىن، ءبىراق 43 جاسىمدا بيىك بەلەستى باعىندىرۋ وڭاي ەڭبەكپەن كەلگەن جوق. باعىمىز شىعار، الماتىدان ۇسىنىلعان 18 ادامنىڭ ىشىندە ءۇش ادامنىڭ جولى بولدى. قامال الاتىن جاستا قولىم جەتكەنىنە ءدان رازىمىن.
وسىدان بىرنەشە جىل بۇرىن «جۇلدىزدار وتباسى» جۋرنالى جىل قورىتىندىسى رەتىندە كەش ۇيىمداستىرىپ، قاتىسۋشىلارعا شاعىن مۇسىنشە سىيلادى. بىردە التى جاستاعى ۇلىم ۇيگە قوناققا كەلگەن كىشكەنتاي قىزداردىڭ ءبىرى سول مۇسىنشەمەن ويناپ وتىرعانىن كورىپ، «بۇل انامنىڭ «وسكارى»، تيىسپە!» دەپ قولىنان جۇلىپ الىپ، سۇرتكىشتەگەنى بار.
سول ساتتە تەمىر-تەرسەك، باعالى-باعاسىز، جاقسى-جامان بولسىن، مەنىڭ كەز كەلگەن سىيلىعىم بالامنىڭ تاربيەسىنە ۇلكەن اسەر ەتەتىنىن ءتۇسىندىم. «بالامنىڭ بالاسىنا ماقتانىش، ۇلگى بولىپ قالاتىنداي ناگرادالار الۋىم كەرەك ەكەن» دەپ تۇيگەنمىن.
جالپى، مەن ءوز باعامدى بىلەتىن اداممىن. ەشكىمگە ەشتەڭە دالەلدەگىم كەلمەيدى، كىم، قالاي ويلاسا دا ءوز ەركى. بۇل سىيلىقتىڭ ەرتەڭ نەمەرەلەرىم «اجەمىز ەلگە ەڭبەگى سىڭگەن قايراتكەر» دەپ ايتا جۇرەتىندەي، ارتىمدا جاقسى ءىز، ماڭگىلىك مۇرا بولىپ قالارىنا قۋانامىن، - دەيدى قازاقستاننىڭ ەڭبەك سىڭىرگەن قايراتكەرى مەرۋەرت تۇسىپبايەۆا.
قورعانىس مينيسترلىگى ورتالىق ءانسامبلىنىڭ ۆوكال توبىنىڭ كوركەمدىك جەتەكشىسى، لەيتەنانت قايىرجان بەردىبايدى جوعارى ناگراداعا جۇمىس ورنى ۇسىنىپتى. مينيستر يمانعالي تاسماعامبەتوۆ «قازاقستاننىڭ ەڭبەك سىڭىرگەن قايراتكەرى» كۋالىگىن سالتاناتتى تۇردە تاپسىرىپ، ءتوس بەلگىسىن ءدال تۋعان كۇنىندە ءوز قولىمەن وڭىرىنە قاداپتى.
- بۇل باستامانى پولكوۆنيك مۇحامەدجان تالاسوۆ اعامىز كوتەرسە كەرەك. ويلاماعان جەردەن، ءبىر مارقايىپ قالدىم. 15 - جەلتوقساندا دۇنيەگە كەلگەنمىن. ءدال سول كۇنى يمانعالي نۇرعالي ۇلىنىڭ قابىلداۋىندا بولىپ، قۋانىشىما قۋانىش قوسىلدى. جاقسىلىعىمدى دوستارىم مەن ارىپتەستەرىمنىڭ اراسىندا اتاپ ءوتتىم.
ارينە، بۇل ماراپات ءبىزدىڭ بارلىعىمىزعا ۇلكەن جاۋاپكەرشىلىك جۇكتەيدى. 2011 - جىلى الماتى قالاسىندا جەكە شىعارماشىلىق كونتسەرت وتكىزگەنمىن. ودان كەيىن 4-5 كليپ ءتۇسىردىم. قۇداي قالاسا، الداعى جىلى استانادا تاعى ءبىر ەسەپ بەرسەم دەپ جوسپارلاپ وتىرمىن. ءقازىردىڭ وزىندە باعدارلاما جاساپ، دايىندىققا كىرىسىپ كەتتىم. ونەر جولىنا ءتۇسىپ، ەلدىڭ الدىنا شىعا باستاعالى ونشاقتى جىلدىڭ ءجۇزى بولىپتى. ازدى- كوپتى ەڭبەگىمدى باعالاعان ءتيىستى ورىندارعا العىس ايتامىن.
مەنى ەلگە، جۇرتقا تانىستىرىپ، باعامدى اسپانداتقان - قاسيەتتى ونەر، قازاق دەگەن ۇلى حالىق. سوندىقتان تۋعان ەلىمە باسىمدى ءيىپ، شامام كەلگەنشە ەڭبەك سىڭىرەمىن، - دەيدى قايىرجان بەردىباي.
ءانشى- كومپوزيتور مەدەت سالىقوۆتىڭ پرەزيدەنت وركەسترىندە جۇمىس ىستەگەنىنە بيىل - 15 جىل. جالپى، ونەر جولى بالا كەزىندە باستالعان. قازىرگى تاڭدا قالقامان سارين ءماتىنىن جازعان «جىبەك سەزىم»، سەرىكزات دۇيسەنعازين ولەڭىن ورگەن «كۇلىمدەسەڭ بولماي ما؟»، اقىن قيزاتبەك نۇربوسىننىڭ تۋىندىسى «ناعاشىما»، سونداي-اق جاڭاباي وتەگەنوۆ ورىنداپ، «ساز الەمى» جوباسىندا باس جۇلدە يەلەنگەن «ايالا» اندەرى جۇرتشىلىققا جاقسى تانىس.
- ماراپاتتى مەملەكەتتىك حاتشى گۇلشارا ءابدىقالىقوۆا تاپسىردى. قايراتكەرلىك اتاعىن الىپ ءجۇرۋ وڭاي ەمەس، جيناقىلىقتى، جاۋاپكەرشىلىكتى، ىزدەنۋدى تالاپ ەتەدى. سوندىقتان ەلگە، ونەرگە قىزمەت ەتۋدى بۇرىنعىدان دا كۇشەيتەمىن. وزگە دە ارىپتەستەرىمدى زور جەتىستىكتەرىمەن شىن جۇرەكتەن قۇتتىقتايمىن، - دەيدى مەدەت سالىقوۆ.
بايداۋلەت قانشايىم
«ايقىن»
