قاڭتاردا «مۋزارت» توبى ەكى بەينەبايانىن جارىققا شىعارادى
«ەكى بەينەبايان ءتۇسىرىلىپ بولدى. ونىڭ ءبىرىنشىسى - «جەڭەشەم» دەگەن ءان. ءسوزىن قالقامان سارين جازدى، ال ءانى - ارمان بەكسۇلتاندىكى. قالجىڭ ءان. بەينەباياندى، اللا قالاسا، قاڭتار ايىندا ناسيحاتتايمىز. كليپكە كوپتەگەن ازىلكەشتەر قاتىستى. ەرەكشەلىگى دە - سول. «كەلىننىڭ اياعىنان، قويشىنىڭ تاياعىنان» دەپ حالىق بەكەر ايتپايدى. سوندىقتان بۇل - جەڭگەلەرىمىزگە ارنالعان ۇلكەن ءبىر توسىن سىي»، - دەدى ءانشى.
مايعازيەۆتىڭ ايتۋىنشا، ءبىرىنشى بەينەبايانعا «شانشار»، «الداراسپان»، «اققۋ مەن گاككۋ» سياقتى ءازىل-سىقاق تەاترلارىنىڭ اكتەرلەرى ءتۇستى. بەينەبايان الماتىدا "567 Сreative laboratory" ستۋدياسىندا ءتۇسىردى. ال ەكىنشى كليپ «مەن سەنى سۇيەمىن» انىنە ءتۇسىرىلدى. ونىڭ ءسوزىن قالقامان سارين، ال ءانىن بەك بوربيەۆ جازعان. ءانشىنىڭ ايتۋىنشا، كليپتىڭ ءتۇسىرىلىم جۇمىستارىمەن وتاندىق كليپمەيكەر جەڭىسحان تورە اينالىستى.
ءانشى «مۋزارت» توبىنىڭ ءۇشىنشى بەينەبايانى دا شىعاتىنىن ايتتى، ءبىراق ونىڭ اتاۋى ازىرشە قۇپيا بولعانىن قالادى. مۇنىمەن قاتار، مايعازيەۆ 2015-جىلدىڭ ناۋرىز ايىندا جەكە كونسەرتىن بەرۋدى جوسپارلاپ وتىر. ايتا كەتەيىك، ول 1- قاڭتاردا 40 جاسقا تولادى.
ەسكە سالا كەتەيىك، بۇعان دەيىن قازاقستانداعى ەڭ كوپ جۇكتەلەتىن فيلمدەر مەن اندەردىڭ رەيتينگى انىقتالىپ، «مۋزارت»- تىڭ» ورىنداۋىنداعى اندەر العاشقى بەستىكتەن كورىنگەن ەدى. ال توپتىڭ مۇشەسى مەيرامبەك بەسبايەۆتىڭ ءان-تەرمەلەر جيناعى رەيتينگتىڭ كوشىن باستادى.
