ۆەنادا راحات اليەۆكە ادام ءولتىردى دەگەن ايىپ تاعىلدى

استانا. قازاقپارات - ۆەنا قالاسىنىڭ پروكۋراتۋراسى سەيسەنبى كۇنى راحات اليەۆكە قاتىستى رەسمي ايىپ تاقتى. اۆستريالىق اقپاراتتىق اگەنتتىككە ۆەنا جەر سوتىنىڭ رەسمي وكىلى توماس ۆەچەيدىڭ مالىمدەۋىنشە، اليەۆكە، اۆسترياداعى بۇرىنعى قازاقستان ەلشىسىنە ادام ءولتىرۋدى ۇيىمداستىردى دەگەن ايىپ تاعىلۋدا. بۇل تۋرالى ت ا س س حابارلايدى.

پروكۋراتۋرا جانە سوت وكىلدەرى ايىپتالۋشىنىڭ قورعاۋشىسىنىڭ قۇجاتتارىمەن ءالى تانىسپاعاندىقتارىنا سىلتەمە جاساپ، بۇدان باسقا تۇسىندىرمە بەرۋدەن باس تارتتى.

ءوز وتانىندا ۇيىمداسقان قىلمىستىق توپ قۇرعانى، ادام ۇرلاعانى جانە ولتىرگەنى ءۇشىن سىرتتاي ۇزاق مەرزىمگە سوتتالعان قازاقستاننىڭ اۆسترياداعى ەكس- ەلشىسى راحات اليەۆ 2014-جىلعى ماۋسىمنىڭ باسىندا ۆەنا پوليتسياسىنا ءوز ەركىمەن كەلگەن ەدى. ونىڭ ادۆوكاتى مانفرەد اينەدتەردىڭ سوزىنە قاراعاندا، ونىڭ قورعاۋىنداعى اليەۆ وسىلايشا تەرگەۋ ىسىنە كومەكتەسپەكشى بولعان.

اليەۆ قازاقستاندا «نۇربانك» دەپ اتالاتىن قىلمىستىق ءىس بويىنشا سىرتتاي 20 جىلعا سوتتالعان. تەرگەۋ نۇسقاسى بويىنشا، اليەۆ ۇيىمداسقان قىلمىستىق توپ قۇرامىندا وسى قارجى ينستيتۋتىنىڭ ەكى توپ-مەنەدجەرىن - جولداس تەمىراليەۆ پەن ايبار حاسەنوۆتى ۇرلاپ كەتكەن. كەيىنىرەك الماتى ماڭىندا ولاردىڭ زورلىق- زومبىلىق بەلگىلەرىمەن ولتىرىلگەن دەنەلەرى تابىلعان.

سونىمەن بىرگە، 2008-جىلى قازاقستاننىڭ اسكەري سوتى اليەۆتى بيلىكتى كۇشتەپ تارتىپ الۋعا تىرىسقانى جانە باسقا دا قىلمىستارى ءۇشىن 20 جىلعا باس بوستاندىعىنان ايىرۋعا ۇكىم شىعارعان. الايدا سوت ۇدەرىسى باستالعانعا دەيىن اليەۆ ەلدەن كەتىپ ۇلگەرگەن.

ءبىرقاتار ۋاقىت ول اۆستريادا بوي تاسالاپ ءجۇردى، 2007-جىلى قازاقستاندىق قۇقىق قورعاۋ ورگاندارى مەن ينتەرپولدىڭ بىرلەسكەن ءىس-قيمىلى اۋقىمىندا ۇستالعان. الايدا اۆستريانىڭ فەدەرالدىق سوتى اليەۆتى قازاقستاندىق تاراپقا ەكستراداتسيالاۋدان باس تارتتى جانە ونى 1 ميلليون ەۋروعا كەپىلمەن بوساتتى. كەيىنىرەك، اليەۆ مالتاعا قونىس اۋدارعان، كەيبىر مالىمەتتەر بويىنشا وسى ەلدىڭ ازاماتتتىعىن الۋعا تىرىسقان.