دوللاردىڭ تەڭگەگە قاتىستى باعامى بويىنشا بولجام جاسالدى

استانا. قازاقپارات - جاڭا جىل قارساڭىندا دوللار مەن وزگە دە ۆاليۋتانىڭ تەڭگەگە قاتىستى باعامىنا شەكتەلەدى.

بۇل جونىندە Tengrinews.kz تىلشىسىنە «الپاري» كومپانياسىنىڭ ساراپشىسى اننا بودروۆا حابارلادى.

ونىڭ ايتۋىنشا، وسى اپتادا دوللار 182,10 - 182,60 تەڭگە، ەۋرو 222,50 تەڭگە جانە رۋبل 3,40 - 3,60 تەڭگە بولادى.

بودروۆانىڭ ايتۋىنشا، 2014 - جىلى تەڭگەنىڭ قۇنى رۋبلگە قاراعاندا جاقسى ساقتالدى.

«جىل سوڭىندا مىندەتتى تۇردە قورىتىندى جاسالادى. الايدا اقپان ايىنداعى تەڭگەنىڭ قۇنسىزدانۋى جاعىمسىز توسىن جاي بولدى، دەگەنمەن تەڭگە ءوز قۇنىن اسىرەسە گريۆنامەن جانە رۋبلمەن سالىستىرعاندا جاقسى ساقتاپ قالدى.

2014 - جىلعى دەۆالۆاتسيا ەسەبىنەن تەڭگەنىڭ دوللارعا شاققانداعى قۇنى 18,40 پايىزعا تومەندەدى، بۇل كورشى ەلدەرمەن سالىستىرعاندا ەداۋىر تومەن. سوندىقتان قازاقستاننىڭ قارجى بيلىگى قۇرمەتكە لايىقتى بالاما ءىستى قولعا الدى: ۋاقىتىلى قولدانىلعان ءبىر جولعى اكتسيا ناتيجەسىندە ۇلتتىق ۆاليۋتاعا از عانا شىعىن كەلدى، رەسەيدىڭ تارتىنشاق، ۇنەمى قاجەتتى شەشىمدى كەشىگىپ قابىلدايتىن ورتالىق بانكى قازاقستاننىڭ ۇلتتىق بانكىنەن ۇلگى الۋى ءتيىس»، - دەدى ساراپشى.

بودروۆانىڭ ايتۋىنشا، قازىر دوللاردىڭ باعامى اقىرىن كوتەرىلىپ كەلەدى. وتكەن اپتادا باعام 0,16 پايىزعا ارتىپ، دوللار 182,35 تەڭگە بولدى. ءبىراق اپتا بويى مۇنايدىڭ باعاسى تومەندەي بەردى. Brent ماركالى مۇنايدىڭ باعاسى 29 - جەلتوقسان كۇنى تاڭەرتەڭ 59,65 دوللار بولدى. «شيكىزات باعاسى ۆاليۋتا نارىعىنا قىسىم كورسەتىپ وتىر»، - دەدى ساراپشى.