تارازدىق مۇعالىم قازاقى ناقىشتاعى قۋىرشاقتار شىعارۋدا

استانا. قازاقپارات - تارازدىق ۇستاز ۇلتتىق ناقىشتاعى ويىنشىقتار شىعارۋدى باستادى.

«قازاق- تۇرىك كوللەدجىنىڭ» وقىتۋشىسى ءاليا نۇرجىگىتوۆا ۇلتىمىزعا قازاق قۋىرشاقتارىن شىعارىپ قىزمەت ەتۋدە.

قازاق ەرتەگىلەرىنىڭ كەيىپكەرلەرى مەن ءتورت تۇلىكتەرىمىز بەينەلەنگەن قۋىرشاقتاردى قولدان ءپىشىپ، جاساپ جاتقانىنا كوپ ۋاقىت بولماعان. ۇسىنعان ونىمدەرى نارىقتاعى قىتاي ويىنشاقتارىنان 10 ەسەگە ارزان.

ءاليا نۇرجىگىتوۆا - ۇستازدىقتان كەتىپ، ۇلتتىق جادىگەرلەرىمىزدى جاڭعىرتۋ ءۇشىن كاسىپكەرلىككە بەت بۇرۋدا. ول ءبىر جىل بۇرىن جامبىل وبلىسى كاسىپكەرلەر پالاتاسى ۇيىمداستىرعان بيزنەس-يدەيالار بايقاۋىنا قاتىسىپ، كوزگە تۇسەدى.

قازاق ەرتەگىلەرى مەن ۇلتتىق ناقىشتاعى قۋىرشاقتار جاساۋ باستاماسى سول ساتتە قولداۋعا يە بولىپتى.

«بۇل يدەيا بازاردا جۇرگەنىمدە ويىما كەلدى. قاراپ تۇرىپ، ويىنشىقتار اراسىندا بىردە-ءبىر قازاقىلىعىمىزدى كورسەتەتىن قۋىرشاق تاپپادىم. بالالارىمىز نەلىكتەن شەتەل مۋلتفيلمدەرىنىڭ كەيىپكەرلەرىنە ەلىكتەۋ كەرەك؟»، - دەيدى ءاليا نۇرجىگىتوۆا.

ۇرپاق بويىنا ۇلتتىق ناقىشتاردى ءسىڭىرۋدى كوزدەگەن ۇستازدىڭ قازىر قول استىندا 3 بىردەي قىزمەتكەرى بار. ولار قۋىرشاقتاردان بولەك ويۋلارمەن كەستەلەنگەن جاستىقشالار مەن ورىندىق جاپقىشتارىن دا شىعارىپ جاتىر.

سونداي-اق، بالالارعا ارنالعان قۇراستىرما- موزايكالار دا وسى شەبەرلەردىڭ قولىنان جارىق كورۋدە.

«بۇگىنگى تاڭدا وتاندىق ءونىم رەتىندە مەن بالالاردىڭ شەشەندىگى مەن شەبەرلىگىن، ەسەپ- قيساپقا قۇمارلىعىن وياتاتىن ويىنشىقتار شىعارۋدامىز. بۇل تەك باستاماسى. ال، كەلەسى جىلى پوليمەر، پلاستماسسا ونىمدەرىنەن قۇراستىرمالى قۋىرشاقتار شىعارماقشىمىز. جانە تازا ءارى تابيعي بولسىن دەپ اعاشتاردان دا ويىنشىقتار جاساۋ جوسپاردا بار»، - دەيدى كاسىپكەر.

ۇلتتىق ناقىشتاعى ويىنشىقتارعا دەن قويىپ جۇرگەن ۇستازعا جەتپەي جاتقانى تەك قارجىلاي قولداۋ عانا.

7 كانال