قازاقستاندا تۇرعىلىقتى جەرىن جۇمىس ورنىندا تىركەۋگە رۇقسات بەرىلدى

استانا. قازاقپارات - مەملەكەت ءوز باسپاناسى جوق ادامداردىڭ جۇمىس ورنىندا تىركەلۋىنە رۇقسات ەتتى. بۇل اقپاراتتى دۇيسەنبى كۇنى ق ر ىشكى ىستەر مينيسترلىگى جاريا ەتتى، دەپ حابارلادى «جەتىنشى ارنا».

پوليتسەيلەردىڭ ايتۋىنشا، بۇل تارماق ءتيىستى زاڭناماعا ەنگىزىلگەن.

«ەگەر بۇرىن تىركەۋسىز تۇرىپ جاتقان ادامدارعا ايىپپۇل عانا كوزدەلگەن بولسا، ەندى ەنگىزىلگەن تۇزەتۋلەرمەن تىركەۋسىز 10 كۇننەن 3 ايعا دەيىن تۇرعان ادامداردا ەسكەرتۋ قاراستىرىلعان. ەگەر 3 ايدان استام ۋاقىت تۇرسا - ايىپپۇل سالىنادى. ءوز باسپاناسى جوق ادامدار قايتكەندە دە ءبىر جەردە تۇرادى، نەمەسە ءۇي جالدايدى - ولار ەسەپكە تۇرۋى نەمەسە جۇمىس ورنىندا تىركەلۋى ءتيىس»، - دەدى ق ر ءى ءى م كوشى-قون پوليتسياسى دەپارتامەنتىنىڭ ۆيزالىق جۇمىستار باسقارماسى باستىعىنىڭ ورىنباسارى دۋلات ىسقاقوۆ.

ەسكە سالا كەتەيىك، 2015-جىلدىڭ 1- قاڭتارىنان باستاپ قۇقىق قورعاۋ ورگاندارى تىركەلگەن جەرى بويىنشا تۇرمايتىن قازاقستاندىقتارعا ايىپپۇل سالۋدى باستايدى. سونىمەن قاتار، باسپانا ۇسىنعان پاتەر يەلەرىنە دە ايىپپۇل سالىنادى. ايىپپۇل مولشەرى 10 مىڭ تەڭگەدەن اسپايدى.