قىزىلورداداعى ەلدىڭ دەگبىرىن قاشىرعان قاۋىپتىڭ بەتى قايتتى

استانا. قازاقپارات - كەشە قىزىلوردا وبلىسىنداعى بوتاباي اۋىلىنا تاسقىن قاۋپى ءتونىپ، ەلدىڭ دەگبىرى قاشا باستاعان ەدى.

تابيعي اپاتتىڭ الدىن-الۋ جۇمىستارى ءساتتى اياقتالىپ، قازىر قاۋىپ سەيىلدى.

ەستەرىڭىزگە سالا كەتەيىك، كۇننىڭ كۇرت جىلىنۋىنان سىرداريا وزەنى ارناسىنان تاسىدى. سالدارىنان شيەلى اۋدانىنىڭ بوتاباي اۋىلىنداعى 5 ءۇيدىڭ اۋلاسىن سۋ باسىپ، 19 ءۇي قاۋىپتى ايماقتا قالدى.

 94 ادام جانە ءىرى قارا مەن ۇساق مال قاۋىپسىز جەرگە كوشىرىلدى. زارداپ شەككەندەر جوق. بۇگىندە ءۇي اۋلالارى تاسقىن سۋدان تولىقتاي تازاردى. توتەنشە جاعدايعا بايلانىستى، اۋدان بيۋدجەتىنەن 5 ميلليون تەڭگەگە جۋىق قارجى ءبولىندى.

ءتىلسىز جاۋ وڭىردەگى جولەك جانە جۋانتوبە ەلدى مەكەندەرىنە دە ءقاۋىپ توندىرگەن بولاتىن. ماماندار دەر كەزىندە جۇمىلىپ، جايىلعان سۋدىڭ باعىتىن باسقا اۋماققا قاراي بۇرىپ ۇلگەردى. ءقازىر داريا سۋى 1,5 مەترگە تومەندەدى.

دەگەنمەن شيەلى اۋدانىنىڭ سۇلۋتوبە، مايلىتوعاي جانە تارتوعاي ەلدى مەكەندەرى ءالى دە ءقاۋىپتى ايماقتا تۇر. سوندىقتان تاسقىننىڭ الدىن الۋ جۇمىستارى ۇزدىكسىز جۇرگىزىلىپ جاتىر. مۇرات كەلەسوۆ، وبلىستىق ت ج د باسشىسىنىڭ ورىنباسارى - قازىرگى تاڭدا سۋدىڭ دەڭگەيى تومەن تۇسكەن.

ءبىزدىڭ توتەنشە جاعدايلار دەپارتامەنتىمەن جەرگىلىكتى اتقارۋشى ورگاندارمەن بىرلەسىپ، قازىر مونيتورينگ جۇرگىزۋدەمىز. تومەن جاقتا تارتوعاي، سۇلۋتوبە اۋىلدارىنا مونيتورينگ جاساپ، سۋدىڭ دەڭگەيىن ءبىرقالىپتى ۇستاپ كەلە جاتىرمىز.

 

www.khabar.kz