شەكتەن شىققان ماشينا ۇرىسى

استانا. قازاقپارات - ونىڭ كولىگى ۇرلاندى. ەسىگىنىڭ الدىنان. ول بۇلاي بولادى دەپ مۇلدە ويلاعان جوق ەدى. «دوستارىمنىڭ قالجىڭى بولار» دەپ ويلاپ، پوليتسيا شاقىرعان جوق. ءبىراق، كۇنى بويى دوستارى بولادى- اۋ دەگەن جەردىڭ ءبارىن قاراپ شىقتى. تابا المادى.

شارشاپ كەلىپ ۇيىقتاپ قالدى. تاڭەرتەڭ تۇرىپ ەدى قىزىق جاعدايعا تاپ بولدى. كولىگى ءوز ورنىندا تۇر. ول اينالىپ ءار جەرىندەگى بەلگىلەرىن، كولىك ءنومىرىن مۇقيات قاراپ شىقتى. ءيا، ءوز كولىگى. ەشقانداي جەرى بۇلىنبەگەن. اشىپ ءىشىن قاراپ ەدى، رۋلدە كونۆەرت قىستىرۋلى تۇر ەكەن. اشىپ قاراپ ەدى - ەكى دانا كينو بيلەتى مەن ءبىر پارشا حات. قايران قالعان ول حاتتى وقي باستادى.. .

«قۇرمەتتى كولىك يەسى!

كولىگىڭىزدى مەن الىپ كەتكەنمىن. ءسىزدىڭ قانشالىقتى اشۋلى ەكەنىڭىزدى بىلەمىن. ءسىزدىڭ ورنىڭىزدا مەن بولسام دا سولاي ىستەر ەدىم. مەنى كەشىرىڭىز! قاتتى ۇياتتىمىن. ءسىزدى ءبىر كۇن اۋرەگە سالعان بولارمىن. ءبىراق، ءسىز كولىكتى نەگە الىپ كەتكەنىمنىڭ سەبەبىن بىلسەڭىز، بالكىم كەشىرىم جاساپ قالۋىڭىز دا مۇمكىن. كەشە ءتۇن ىشىندە ايەلىمنىڭ تولعاعى قىستى. ونى جەدەل تۇردە پەرەزەنتحاناعا جەتكىزۋ ءۇشىن تاكسي توستىم. ءبىراق، تولعاق قىسقان ايەل مەن جالعىز ەركەكتى ەشكىم دە العىسى كەلمەدى. وسىلاي جارتى ساعات ۋاقىت ءوتتى. جولدا تىزەمدى بۇگىپ تە جالىنىپ كوردىم، شارا بولمادى. اقىر سوڭىندا شىداماي كەتتىم دە ۇيلەر اراسىنان ءسىزدىڭ كولىگىڭىزدى ەپتەپ اشىپ، ايداپ كەتتىم. قاتتى قورىقتىم، ءبىراق امالىم بولمادى. ەگەر ءسىزدىڭ باسىڭىزدا وسىنداي جاعداي بولسا، نە ىستەر ەدىڭىز؟ جالپى، سىزگە كوپ راحمەت. ايەلىم جەڭىلدەپ، قۋانىپ جاتىرمىز. مىناۋ ەكى بيلەت ەرتەڭ تۇساۋكەسەرى بولاتىن كينونىڭ بيلەتتەرى. جۇبايىڭىز ەكەۋىڭىزگە مەنەن سىيلىق.

سىزگە دەگەن ريزالىعىم شەكسىز. سىزدەردى ەرتەڭ كينوتەاتردىڭ الدىندا كۇتەمىن.. .

قۇرمەتپەن كولىك ۇرلاۋشىڭىز»

حاتتى وقىعاننان كەيىن كولىك يەسى وزىندەگى اشۋ- ىزانىڭ قالاي تاراپ كەتكەنىن بىلمەي قالدى. «مىنا سوزدەرىنە قاراعاندا جامان ادام ەمەس سياقتى» دەپ ويلادى ول ىشىنەن. ادامنىڭ باسىنا نە كۇن تۋمايدى دەيسىڭ، ارتىق دۇنيەنى قۋزاپ نە ىستەيمىن دەپ ويلاعان ول ۇيىنە كىرىپ ايەلىنە بولعاي جايدى باياندادى. ەرتەسى ەرلى- زايىپتى كينوعا باردى، دەگەنمەن ۋادەلەسكەن ادامدارىن كەزدەستىرە قويمادى. كينو دا ءبىتتى. الگى ادام سوندا دا كورىنگەن جوق. ولار ءماز- مەيرام بولىسىپ ۇيگە كەلدى. ەسىكتەن كىرە سالا بولعان جايعا قاراپ اڭتارىلىپ قالدى. ءۇيدىڭ استان- كەستەڭى شىعىپ جاتىر ەدى. اقشاعا جارايتىن زاتتىڭ ءبارى جوق. تەك ءتور ءۇيدىڭ قابىرعاسىندا ۇلكەن ەتىپ مىنا سوزدەر جازىلىپ تۇردى: «مىرزا، كينو شىنىمەن دە تاماشا بولدى، ءيا؟ !»

massaget.kz