دەپۋتاتتار توبەلەسىپ قالدى - كەسكىن

استانا. قازاقپارات - وتكەن جۇمادا گرۋزيانىڭ بۇرىنعى پرەزيدەنتى ميحايل ساكاشۆيليدىڭ «ءبىرتۇتاس ۇلتتىق قوزعالىس» پارتياسى مەن قازىرگى بيلىك ەتۋشى كواليتسيا پارتياسى - «گرۋزيا ارمانى» دەپۋتاتتارى توبەلەسىپ، پارلامەنت تىڭدالىمى كىلت ءۇزىلدى.

«نوۆوستي گرۋزي» اقپاراتتىق پورتالىنداعى مالىمەتتەر بويىنشا، توبەلەسكە پارلامەنت تىڭدالىمىندا ءسوز العان ۇلتتىق قوزعالىس وكىلى اكاكي بوبوحيدزەنىڭ «گرۋزيا ارمانىنداعى» ءبىر ارىپتەسىن بالاعاتتاپ جىبەرۋى نەگىز بولعان.

بۇدان سوڭ دەپۋتاتتاردىڭ بارلىعى (ايەلىنەن باسقاسى) ورتاعا شىعىپ، ەركەكتەرشە ءبىر-ءبىرىن جەكپە-جەككە شاقىرعان. ءوزارا جۇدىرىق سىلتەۋ كەزىندە بيلىك ەتۋشى پارتيا تاراپىنان سوسو دجاچۆلياني، داۆيد لورتكيپانيدزە، تاماز دجاپاريدزە جانە دزيۋدو بويىنشا الەم چەمپيونى زۋراب زۆياداۋري ەرەكشە كوزگە تۇسكەن.

اسىرەسە، زۆياداۋري اككىلىك تانىتىپ، ۇستەلدەر ۇستىنەن سەكىرىپ، توبەلەستىڭ باس سەبەپكەرى - بوبوحيدزەگە باس سالعان. ەكى دەپۋتات قاتتى زاقىم الىپ، ءتىپتى جەدەل جاردەم كولىگىن دە شاقىرتقان.

«الاش ايناسى»