وباما: ا ق ش كەلەسى اپتادا اۋعانستانداعى جاۋىنگەرلىك ميسسياسىن اياقتايدى

استانا. قازاقپارات - ا ق ش كەلەسى اپتادا اۋعانستانداعى ءوزىنىڭ جاۋىنگەرلىك ميسسياسىن اياقتايدى. بۇل كۇندەرى گاۆاي ارالدارىندا روجدەستۆولىق دەمالىستا جۇرگەن ا ق ش پرەزيدەنتى باراك وباما امەريكاندىق اسكەري قىزمەتشىلەرمەن كەزدەسۋدە وسىنداي مالىمدەمە جاسادى، دەپ حابارلادى ت ا س س.

«ءبىز 13 جىلدان استام ۋاقىت بويى سوعىس جاعدايىندا بولدىق»، دەدى ول، اۋعانستاندا 2001-جىلعى قازاندا باستالعان وپەراتسيا ۆاشينگتون مەن نيۋ-يوركتەگى لاڭكەستىك اكتىلەرگە جاۋاپ ەكەنىن ايتا كەلىپ.

«كەلەسى اپتادا ءبىز اۋعاستانداعى ءوز جاۋىنگەرلىك ميسسيامىزدى اياقتايمىز»، دەپ سەندىردى وباما، بۇعان كەزدەسۋگە قاتىسىپ وتىرعان اسكەري قىزمەتشىلەردىڭ ءبىرى «ۋرا» دەپ ايقايلاپ جىبەردى، ونىڭ قارۋلاس جولداستارى بۇل حاباردى قول شاپالاقتاپ قارسى الدى.

وباما امەريكاندىق سوعىس ناۋقانىنىڭ ارقاسىندا اۋعاندىقتاردىڭ «ءوز ەلىن قالپىنا كەلتىرۋ مۇمكىندىگى بار» ەكەنىنە سەنىمىن ءبىلدىردى، قۇراما شتاتتاردىڭ دا قاۋىپسىزدىگى نىعايا ءتۇستى. اۋعانستان «بۇدان بىلاي لاڭكەستىك شابۋىلداردىڭ وشاعى بولمايدى» دەپ سانايدى اق ءۇي قوجايىنى.

ول سونىمەن قاتار، الدا ءالى دە «يراكتى قوسا العاندا، الەمنىڭ ءارتۇرلى بولىگىندە كۇردەلى ميسسيالار» بار ەكەنىن اتاپ ءوتتى، ولاردىڭ اراسىندا ا ق ش- تىڭ «يسلام مەملەكەتى» لاڭكەستىك توبىمەن كۇرەسكە قاتىساتىنىن تىلگە تيەك ەتتى.