08:38, 29 - جەلتوقسان 2014 | GMT +5
قىتاي قىزى جانار دۇعالوۆانىڭ ءانىن شىرقاپ، تانىمال ءان بايقاۋىنىڭ جەڭىمپازى اتاندى - كەسكىن
استانا. قازاقپارات - عالامتوردا قىتاي قىزى قازاقتىڭ ۇلتتىق ءبيى «قارا جورعانى» بيلەپ، قازاقستاندىق ءانشى جانار دۇعالوۆانىڭ ءانىن شىرقاعان بەينەروليك پايدا بولدى.
بۇل ونەرپاز قىزدىڭ ەسىمى - ۋاڭ نان فەي، قىتايدىڭ ىلە قازاق اۆتونوميالى وبلىسىندا دۇنيەگە كەلگەن. ول قازاق ءبيىن بيلەپ، قازاق ءانىن ايتۋدى ۇناتاتىن كورىنەدى. وسى ونەرىنىڭ ارقاسىندا بويجەتكەن قىتايداعى ەڭ تانىمال ءان بايقاۋلارىنىڭ ءبىرى «شيڭ گۋاڭ دا داۋدىڭ» اپتالىق جۇلدەگەرى اتانىپ وتىر.
قازىرگى تاڭدا ۋاڭ نان فەي پەكيندەگى ۇلتتار ۋنيۆەرسيتەتىندە ءبىلىم الادى.
ايتا كەتەيىك، جانار دۇعالوۆا ءبىراز ۋاقىت بۇرىن تاتارستاننىڭ قازان قالاسىندا اياقتالعان حالىقارالىق «تۇركۆيجن 2014» ءان بايقاۋىندا قازاقستان نامىسىن قورعاپ، جەڭىمپاز اتانعان بولاتىن.
قازىرگى تاڭدا ول انشىلىك ونەرىمەن قوسا سازگەرلىككە دە دەن قويىپ كەلەدى. جوعارىدا اتالعان حالىقارالىق ءان دوداسىندا جانار ءسوزىن رينات زايتوۆ جازعان «ءىزىن كورەم» اتتى ءوز ءانىن شىرقاعان بولاتىن.
