ەكى جىلدان كەيىن مەن جاڭا پرەزيدەنتكە مۇلدە باسقا ەلدى تاپسىرامىن - قىرعىزستان پرەزيدەنتى

استانا. قازاقپارات - قىرعىزستان پرەزيدەنتى المازبەك اتامبايەۆ ەلدىڭ قازىرگى كونستيتۋتسياسىندا كوپتەگەن كەمشىلىكتەر بار جانە ول رەفورمالاۋدى قاجەت ەتەدى، دەپ سانايدى.

«نەبارى ءبىر ايدىڭ ىشىندە جازىلعان كونستيتۋتسيا جەتىلگەن بولا المايدى. بۇل كونستيتۋتسيادا كوپتەگەن كەمشىلىكتەر بار جانە ەرتە مە، كەش پە بىردەڭەنى وزگەرتۋ كەرەك. ەگەر ءبىز سوتىمىزدىڭ جاقسى بولعانىن قالاساق، كونستيتۋتسيامىزدى اۋىستىرۋعا تۋرا كەلەدى»، - دەدى ول 2014 - جىلدىڭ قورىتىندىسى بويىنشا وتكەن باسپا ءسوز ءماسليحاتىنىڭ بارىسىندا جۋرناليستەردىڭ قويعان سۇراقتارىنا جاۋاپ بەرە وتىرىپ، دەپ حابارلادى ر ي ا نوۆوستي.

قىرعىز ەلىنىڭ پرەزيدەنتتىڭ مالىمەتتەرى بويىنشا، ەلدە قازىردىڭ وزىندە جۇرگىزىلىپ جاتقان سوت رەفورماسى كونستيتۋتسيا اياسىندا ءبىرقاتار شەكتەۋلەرگە تاپ بولۋدا.

«جوعارعى سوتتىڭ شەشىمىنىڭ سوڭعى ءتۇيىندى شەشىم بولۋى دۇرىس ەمەس»، - دەدى اتامبايەۆ.

وسى ەلدەگى 2010 - جىلعى توڭكەرىستەن كەيىن قابىلدانعان قىرعىزستاننىڭ كونستيتۋتسياسىندا ول 20 جىل بويى وزگەرتىلە المايدى دەلىنگەن.

«قازىرگى قولدانىستاعى كونستيتۋتسيانىڭ اياسىندا سوت رەفورماسىن جۇرگىزۋ وتە قيىن بولادى»، - دەپ اتاپ ءوتتى ا. اتامبايەۆ.

ول ەلدىڭ اتا زاڭىن رەفورمالاۋدى ءوزىنىڭ وكىلەتتىلىگىن ۇزارتۋ ءۇشىن جوسپارلامايتىنىن ايتتى.

«2  جىل 9 ايدان كەيىن مەن جاڭا پرەزيدەنتكە مۇلدە باسقا ەلدى تاپسىرامىن»، - دەدى ول.

قىرعىزستاننىڭ كونستيتۋتسياسى بويىنشا، بۇل ەلدە پرەزيدەنت بەسجىلدىق مەرزىمگە تەك ءبىر رەت قانا سايلانادى.