الماتى اكىمى احمەتجان ەسىموۆ سوعىس ارداگەرلەرىنە ەلباسىنىڭ جاڭاجىلدىق قۇتتىقتاۋىن جەتكىزدى - فوتو
جاڭا جىل ءبىزدىڭ ەلىمىز ءۇشىن ماڭىزدى تاريحي وقيعالارعا تولى بولماق. سونىڭ ىشىندە ۇلى وتان سوعىسىنداعى جەڭىسكە 70 جىل تولماق. وسى ورايدا مەملەكەت باسشىسى نۇرسۇلتان نازاربايەۆ ەلىمىزدەگى 5115 ارداگەردى مەرەيلى مەرەكەمەن قۇتتىقتاۋ جەدەلحاتىن جىبەردى.
«قۇرمەتتى ارداگەرلەر، سىزدەردى سوعىستىڭ جەڭىسپەن اياقتالعانىنا 70 جىل تولاتىن جاڭا جىلدارىڭىزبەن قۇتتىقتايمىن. سىزدەردىڭ زامانداستارىڭىزدىڭ سوعىس كەزىندەگى وشپەس ەرلىگى مەن تىڭ كوتەرۋ كەزىندەگى ەرەن ەڭبەكتەرى، ەل تاۋەلسىزدىگىن نىعايتۋعا قوسقان ۇلەستەرى كەيىنگى ۇرپاققا ونەگە. قازاقستاندىقتار سىزدەردىڭ ەرلىكتەرىڭىزى ەش ۇمىتپاي، قۇرمەتكە بولەپ وتەدى. الداعى ۇلى جەڭىس مەيرامىن ەسەندىكتە كورۋدى جازسىن. سىزدەرگە زور دەنساۋلىق، ۇزاق عۇمىر، وتباسىلارىڭىزعا اماندىق تىلەيمىن»، - دەدى قالا باسشىسى پرەزيدەنت نۇرسۇلتان نازاربايەۆتىڭ جەدەلحاتىن وقي وتىرىپ.
قالا اكىمى ارداگەرلەرگە 2015 - جىلدىڭ 9 - مامىرىندا سالتاناتتى شەرۋگە قاتىسۋعا ءازىر بولۋدى «بۇيىردى».
ەستەرىڭىزگە سالا كەتەيىك، قازاقستاندا ەلباسى نۇرسۇلتان نازاربايەۆتىڭ باستاماسىمەن ۇلى جەڭىستىڭ 70 جىلدىعىنا ارنالعان سوعىس ارداگەرلەرىن قولداۋ جونىندەگى جالپى ۇلتتىق بىرەگەي اكسيا باستالدى. مەملەكەت باسشىسى نۇرسۇلتان نازاربايەۆ مەرەيلى داتاعا بايلانىستى قازاقستانداعى 5115 ارداگەردىڭ ءارقايسىسىنا قۇتتىقتاۋ حاتىن جازىپ، سىي-سىياپاتتار جولداعان بولاتىن.
سونداي-اق راديوتەحنيكا جانە بايلانىس اسكەري ينستيتۋتىنىڭ كۋرسانتتارى قارتتارعا سىيلىق تابىستاپ، قۇرمەت كورسەتتى.
قازىرگى تاڭدا ەلىمىزدە 5115 ارداگەر قالسا، ولاردىڭ 900 ى الماتىدا ءومىر سۇرۋدە. بۇل وڭتۇستىك استانا باسشىلىعىنىڭ وڭتايلى الەۋمەتتىك جاعداي قالىپتاستىرىپ وتىرعاندىعىنىڭ بەلگىسى بولسا كەرەك، دەيدى ارداگەرلەر.
«70 جىلدا مۇنداي جوعارى قۇرمەت، قامقورلىق بولماعان. ۇلى جەڭىستىڭ مەرەيى جىلدار جىلجىعان سايىن ارتا بەرمەك. الماتى قالاسىنىڭ باسشىلىعى زەينەتكەرلەر مەن قارتتارعا، ارداگەرلەرگە ۇلكەن ءمورالدىق، ماتەريالدىق قولداۋ كورسەتىپ كەلەدى. ءبىزدىڭ ءومىرىمىزدى ۇزارتۋعا بار جاعداي جاسالىپ جاتىر. ارينە، الەۋمەتتىك، مەديتسينالىق كومەكپەن قامتۋ، كوممۋنالدىق قىزمەتتەردىڭ جەڭىلدىگى دەگەن سياقتى قولداۋلاردىڭ ارقاسىندا ولاردىڭ تۇرمىسىن جەڭىلدەتىپ، ءومىرىن ۇزارتۋعا بولادى. وسى ءۇشىن مەملەكەت باسشىسى نۇرسۇلتان نازاربايەۆقا العىس ايتقىم كەلەدى»، - دەدى الماتى ارداگەرلەر كەڭەسىنىڭ ءتوراعاسى ەرەنعايىپ شايحۋتدينوۆ.
ۇلى جەڭىستىڭ 50,55,60,65 جىلدىعىنا ارنالعان ماسكەۋدەگى جەڭىس شەرۋلەرىنە قاتىسقان بىردەن-بىر جاۋىنگەر، وتستاۆكاداعى پولكوۆنيك، مەملەكەت قايراتكەرى سۇلتان جيەنبايەۆ سول ءبىر ازالى جىلدار تۋرالى ەستەلىگىمەن بولىسە كەتتى.
«رجيەۆ شوقىسى» ءۇشىن ايقاس 100- بريگادانىڭ 1- باتالون ءۇشىن ۇلكەن سىناق بولدى. ودان «ءتىرى قالامىز» دەپ ەشكىم ويلاماعان ەدى. بۇل توزاقتىڭ ورتاسىندا بولعان ورىس جازۋشىسى ك. سيمونوۆ ول شەپتى «ءولىم اڭعارى» دەپ جازعان ەدى كەيىن.
مەن باتالونىمنىڭ 80 پايىزىن رجيەۆ تۇبىندە جوعالتتىم. مۇندا قازاقتار ۇلكەن ەرلىك كورسەتتى. مەن كەيىن جەڭىستىڭ 65 -جىلدىعى قارساڭىندا رجيەۆ قالاسىندا وتكەن ميتينگكە قاتىستىم. جەرگىلىكتى تۇرعىندار قازاقتاردىڭ ەرلىگىن ەشقاشان ۇمىتپايتىنىن ايتىپ جاتتى. مەنىمەن بىرگە قازاقتىڭ باتىر قىزى مانشۇك مامەتوۆا سوعىستى»، - دەدى سۇلتان جيەنبايەۆ.
اۆتور: گۇلميرا عوسمانالي
