قىدىرالى بولمانوۆتىڭ «قاراقاتى» قانشا تۇرادى؟

استانا. قازاقپارات - تانىمال ءانشى ءارى پروديۋسەر قىدىرالى بولمانوۆتىڭ يدەياسىمەن شىعارىلعان «بال-بالا» ويىنشىقتارىنىڭ باعاسى، اسىرەسە، «قاراقات» قۋىرشاعىنىڭ قۇنى كوپشىلىكتى شوشىندىردى.

ءوزىنىڭ سۇيىكتى جارى قاراقاتقا ارناپ شىعارعان قۋىرشاقتىڭ باعاسى «بال- بالانىڭ» رەسمي 90 مىڭ تەڭگە دەپ كورسەتىلگەن.

مۇنى الەۋمەتتىك جەلى پايدالانۋشىلارى تالقىلاپ، بۇل باعانىڭ قۋىرشاق ءۇشىن تىم قىمبات ەكەنىن ايتقان.

«قاراقات» قۋىرشاعى سابيمەن سويلەسىپ، بيلەپ، «اينالايىن» ءانىن اياعىنا دەيىن ورىندايدى، كيىمدەرى قولدان تىگىلگەن، سىرعا مەن شاش باۋى كۇمىستەن ارنايى جاسالعان، قولدا ۇستاعانعا جاعىمدى، تاماشا كوڭىل- كۇي سىيلايتىن باعالى سىيلىق.

قاراقاتتان بولەك، اقىلبەك جەمەنەيدىڭ ورىنداۋىداعى «قىزىل ورىك» ءانىن بيلەپ ورىندايتىن ويىنشىق تا بار. الايدا، اقىلبەك قاراقاتقا قاراعاندا الدەقايدا ارزان - 6000 تەڭگە.

دومبىرادا وتە شەبەر ويناپ، ءازىل اندەر ايتاتىن «الدار كوسە» قۋىرشاعى دا اقىلبەك جەمەنەيدەن قىمبات - 7000 تەڭگە.

«باقىتتىمىن قوشاقاندارى» بولسا، قىدىرالى مەن قاراقاتتىڭ «باقىتتىمىن وزىڭمەن» ءانىن ورىندايدى. سايتتا بۇل قۋىرشاقتار «كوتەرىڭكى كوڭىل-كۇي سىيلايتىن وتە جاعىمدى سىيلىق» دەپ سيپاتتالعان.

ەسكە سالا كەتەيىك، وسىدان ەكى جىل بۇرىن بولمانوۆ «قاراقات» قۋىرشاعىن 20 مىڭ تەڭگەدەن ساتقان بولاتىن.

«بۇل ەڭ قىمبات قۋىرشاق. ونىڭ ەرەكشەلىگى - قۋىرشاقتىڭ كيىمى قاراقاتتىڭ كونسەرتتىك كويلەكتەرىنىڭ ۇلگىسى بويىنشا جاسالعان، قاراقاتتىڭ داۋسىمەن ءان سالادى. بۇل ويىنشىق - قولونەر تۋىندىسى. مۇنىڭ بارلىعى كەز كەلگەن حالىقارالىق كورمەلەردە ۇيالماي كورسەتە الاتىنداي دەڭگەيدە جاسالىپ وتىر، سونىمەن قاتار بۇل قۋىرشاقتى كەز كەلگەن ەلشى، ساياساتكەر، پرەزيدەنتكە سىي رەتىندە تارتۋعا بولادى»، - دەگەن ەدى بولمانوۆ.

NUR. KZ