الەمدىك ەكونوميكا مەن حالىقارالىق ساياساتتاعى دۇربەلەڭگە قاراماستان، بيىل قازاقستان ءۇشىن ەرەكشە جىل بولدى - قاسىم- جومارت توقايەۆ

استانا. قازاقپارات - الەمدىك ەكونوميكا مەن حالىقارالىق ساياساتتا ورىن الىپ وتىرعان دۇربەلەڭ كەزەڭگە قاراماستان، بيىلعى جىل قازاقستان ءۇشىن ەرەكشە بولدى.

بۇگىن پارلامەنت سەناتىنىڭ جالپى وتىرىسىندا اعىمداعى جىلدى قورىتىندىلاعان پالاتا سپيكەرى قاسىم- جومارت توقايەۆ وسىلاي مالىمدەدى.

«ەلباسى ن. نازاربايەۆتىڭ باسشىلىعىمەن دەر كەزىندە قابىلدانعان كورەگەن شەشىمدەر مەن ۇتىمدى ءىس- قيمىلداردىڭ ارقاسىندا ەلىمىز ناقتى كورسەتكىشتەرگە قول جەتكىزدى. پارلامەنت ۇكىمەتپەن ءوزارا تىعىز جۇمىس جۇرگىزىپ، زاڭ شىعارماشىلىعى اياسىنداعى جاۋاپتى مىندەتتەردى ابىرويمەن اتقاردى. بيىلعى جىلى قابىلدانعان 113 زاڭ تۇتاستاي العاندا، ەلىمىزدىڭ الەۋمەتتىك- ەكونوميكالىق ورلەۋىن كوزدەيتىن ستراتەگيالىق باعدارلامالاردى ىسكە اسىرۋدىڭ بەرىك قۇقىقتىق نەگىزى بولىپ تابىلادى. الەمدىك قوعامداستىقتا تۋىنداعان ايرىقشا سىن- قاتەرلەرمەن ەرەكشەلەنگەن 2014 - جىل ۋاقىت تالابىنا ساي جەدەل ءارى ءتيىمدى شەشىمدەر قابىلداۋعا ءاردايىم ءازىر بولۋدىڭ ماڭىزدىلىعىن كورسەتتى»، - دەدى پالاتا ءتوراعاسى.

ق. توقايەۆ بۇدان بولەك، الداعى 2015 - جىلى جۇيەلى تۇردە جۇرگىزىلەتىن كۇردەلى جۇمىستار كۇتىپ تۇرعانىن اتاپ ءوتتى.

«ماڭگىلىك ەل يگىلىگى ءۇشىن «نۇرلى جول» باعدارلاماسىن تابىستى ورىنداۋ ەلباسىنىڭ بارشامىزعا جۇكتەگەن تاريحي جاۋاپكەرشىلىگى ەكەنىن ءارقاشان ەستە ساقتاۋىمىز قاجەت. ەلىمىزدە جوسپارلانعان اسا ءىرى جوبالاردى زاڭنامالىق تۇرعىدان قامتاماسىز ەتۋ ءبىزدىڭ باستى مىندەتىمىز. ەلباسى ايتىپ وتكەندەي، حالىقتىڭ ءال- اۋقاتىن كۇشەيتۋ، ءومىر ساپاسىن جاقسارتۋ مەملەكەت ءۇشىن اسا ماڭىزدى مىندەت. سوندىقتان الەۋمەتتىك باعىتتاعى ماسەلەلەردى ۇدايى نازاردا ۇستاۋىمىز كەرەك»، - دەدى سەنات سپيكەرى.

سونىمەن قاتار ءتوراعا ساناۋلى كۇندەردەن سوڭ جۇمىسىن باستايتىن ەۋرازيالىق ەكونوميكالىق وداق شەڭبەرىندە قازاقستاننىڭ مۇددەسىن زاڭنامالىق تۇرعىدان قامتاماسىز ەتۋ ماسەلەسى دە كۇن تارتىبىنەن شەت قالمايتىنىن اتاپ ءوتتى.

«كەشە ەلباسى ن. نازاربايەۆ يندۋستريالاندىرۋ كۇنى اياسىنداعى جيىن بارىسىندا «جاڭا ءونىمدى جۇمىس ورىندارىن كوبىرەك اشا العان مەملەكەت قانا جەڭىسكە جەتەدى» ، دەپ كەدەرگىلەر مەن قيىندىقتارعا تولى ۋاقىتتا تاباندى ەڭبەك ەتۋدىڭ ماڭىزىنا ايرىقشا نازار اۋداردى. ەلىمىز يندۋستريالدى- يننوۆاتسيالىق دامۋ باعدارلاماسىنىڭ العاشقى بەسجىلدىعىن ويداعىداي جۇزەگە اسىرىپ، دامۋدىڭ نۇرلى جولىنا اياق باستى. تۇپتەپ كەلگەندە، ەل يگىلىگى ءۇشىن تەر توگىپ، ايانباي ەڭبەك ەتەتىن قوعام مەملەكەتتى تابىستى دامۋ جولىنا شىعاراتىن بىردەن ءبىر ماڭىزدى فاكتور ەكەنى داۋسىز»، - دەدى جيىندى قورىتىندىلاعان سەنات سپيكەرى.

بۇدان بولەك، پالاتا ءتوراعاسى 2015 - جىل - ەلىمىزدىڭ قوعامدىق- ساياسي جانە رۋحاني ءومىرى ءۇشىن دە ەرەكشە بولاتىنىن اتاپ ءوتتى.

«بارشا قازاقستاندىقتار قازاق حاندىعىنىڭ 550 جىلدىعىن، اتا زاڭىمىز بەن قازاقستان حالقى اسسامبلەياسىنىڭ 20 جىلدىعىن جانە ۇلى جەڭىستىڭ 70 جىلدىعىن قارسى الۋعا دايىندالۋدا. ءتول تاريحىمىزدىڭ ۇلى قۇندىلىقتارىن قاستەرلەۋ ۇلتتىق مۇددەمىز بەن قازاقستاندىق وتانسۇيگىشتىكتى نىعايتۋدىڭ ءتۇپقازىعى بولاتىنى انىق»، - دەي وتىرىپ سپيكەر ق. توقايەۆ ارىپتەستەرىن كەلە جاتقان جاڭا جىلمەن قۇتتىقتادى.

اۆتور: قانات مامەتقازى ۇلى