مىرزاگەلدى كەمەلدىڭ «اقىل قالتا» كىتابى قىتايدا جارىق كوردى
ويتكەنى «اقىل قالتا» كىتابى توتە جازۋمەن جانە ءبىزدىڭ ەلدە قولدانىلاتىن كەيبىر حالىقارالىق سوزدەردىڭ تەرميندەرى شەتەلدەگى وتانداستارمىزعا تۇسىنىكتى ۇعىمدا جازىلدى.
م. كەمەلدىڭ توتە جازۋداعى «اقىل قالتا» كىتابىن باسپاعا دايىنداعان، سول ارقىلى ەكى ەل اراسىنداعى رۋحاني بايلانىستىڭ دامۋىنا اتسالىسقان ازامات - شىنجاڭ ولكەسىنىڭ ورتالىعى ءۇرىمجى قالاسىنداعى شىنجاڭ حالىق باسپاسىنىڭ اعا رەداكتورى ءسىمادىل شۇكەن ۇلى.
مىنە، ەندى ءۇرىمجى قالاسىنان قۋانىشتى حابار كەلىپ وتىر. ونى شىنجاڭ حالىق باسپاسىنىڭ اعا رەداكتورى ءسىمادىل شۇكەن ۇلىنىڭ ءوزى جولداپتى. ول ءوز حاتىندا قازاقستان جازۋشىلار وداعىنىڭ مۇشەسى، پروفەسسور مىرزاگەلدى كەمەلدىڭ «اقىل قالتا» كىتابى قازاقستاندا باسىلىم كورگەننەن كەيىن، شەتەلدە تۇراتىن كوزى قاراقتى وقىرمانداردىڭ سۇرانىسىنا، ىزدەپ ءجۇرىپ وقيتىن كىتابىنا اينالعانىن جازادى.
«سوندىقتان بۇل كىتاپتى توتە جازۋمەن شىعارۋدى جوسپارلادىق. سول ماقساتتى ويلاستىرا كەلە، بيىلعى جىلى قازاق مەملەكەتىنىڭ تاۋەلسىزدىك كۇنىنە وراي 1500 تارالىممەن باسىلىپ شىقتى جانە وقىرمانداردىڭ القاۋلى كىتابىنا اينالىپ وتىر»، - دەيدى ءسىمادىل شۇكەن ۇلى.
كىتاپتاعى دۇنيە حالىقتارىنان شىققان ويشىل دانىشپانداردىڭ، كەمەڭگەرلەردىڭ، ادامزات اقىل- ويىنىڭ جاۋھارلارى جيناقتالىپ، سۇرىپتالىپ، ادام تاربيەسىنە، ىزگىلىك قاسيەتتەرىنە جەتەلەيتىن ۇنامدى تۇستارى بۇل تۋىندىنىڭ ۇلكەن سۇرانىسقا يە بولۋىنا جانە باسپادان شىعۋىنا تىكەلەي سەبەپ بولعان.
ءسىمادىل شۇكەن ۇلى ءوز حاتىن: «جاھاندانۋ ۇردىسىندەگى مادەنيەتتى قالاي ءتۇسىنۋ، ۇلت مادەنيەتىن، ءداستۇرىن قالاي ساقتاپ قالۋ جايىندا مۇنداعى قازاق وقىرماندارىنا جول نۇسقايتىن «اقىل قالتا» كىتابى ءار قازاقتىڭ ۇيىندە بولۋعا ءتيىستى كىتاپ. اۆتورعا كىتاپتى توتە جازۋمەن شىعارىپ، ءورىسىن كەڭىتۋگە بەرگەن كەلىسىمى ءۇشىن راحمەت ايتا وتىرىپ، ويعا العان يگىلىكتى ءىسىمىزدىڭ ورىندالعانىن قۋانا حابارلايمىز. بۇل ءبىزدىڭ تاۋەلسىزدىك مەرەكەسىنە قوسقان ۇلەسىمىز! قۇتتىقتايمىز!»، - دەپ قازاق ەلىنە دەگەن ىستىق سالەمىمەن جانە قۇتتىقتاۋىمەن اياقتاپتى.
اۆتور: ايدىن بايمەن
