ا ق ش پرەزيدەنتى ءبىر جىل بۇرىن بەرگەن ۋادەسىندە تۇرا المادى

استانا. قازاقپارات - ا ق ش پرەزيدەنتى باراك وبامانىڭ باسىنا ءتاج كيىپ تۇسكەن سۋرەتى عالامتوردا تاراپ كەتتى. بالانىڭ مەرەكەلىك باس كيىمىن ول وكلاحوما شتاتىنداعى تالسا قالاسىنىڭ جاستارىمەن سۋرەتكە ءتۇسۋ ءۇشىن كيگەن.

بۇل تۋرالى Bnews.kz حابارلايدى .

بۇل سۋرەت 2014-جىلدىڭ مامىر ايىندا ءتۇسىرىلىپتى. وسى ۋاقىتقا دەيىن جاسىرىن بولىپ كەلگەن سۋرەتتى اق ءۇيدىڭ باس فوتوگرافى پيت سوۋزا سارسەنبى كۇنى Instagram الەۋمەتتىك جەلىسىندەگى ءوزىنىڭ جەكە پاراقشاسىندا جاريالاپتى. ونىڭ ايتۋىنشا، جاستار ءوتىنىپ قويماعان سوڭ وباما ولاردىڭ كوڭىلىن جىقپاۋ ءۇشىن، باسىنا ءتاج كيىپ سۋرەتكە تۇسۋگە ءماجبۇر بولعان. پرەزيدەنت وسىلايشا مەملەكەتتى باسقارىپ تۇرعاندا باسىما ەشقانداي باس كيىم كيمەيمىن دەگەن ءوز ەرەجەسىن بۇزىپ وتىر.

2013-جىلى وباما ەرەجەنى بۇزباۋ ءۇشىن اسكەري-تەڭىز فۋتبول كومانداسىنىڭ شلەمىن كيۋدەن باس تارتقان بولاتىن. شلەمدى سىيعا تارتقان فۋتبول كومانداسىنىڭ مۇشەلەرىنە پرەزيدەنت بىلاي دەگەن بولاتىن: «ءبىر ەرەجەنى قاتاڭ تۇردە ۇستانامىن: پرەزيدەنت بولىپ تۇرعاندا باسىما ەشقانداي باس كيىم كيمەيمىن. بۇل بىرىنشىدەن، مەملەكەت باسشىسىنا ءتان قاسيەت ەمەس دەپ ەسەپتەيمىن، ەكىنشىدەن، حالىقتان ۇيات بولادى». دەگەنمەن، پرەزيدەنت ءبىر جىل بۇرىن بەرگەن ۋادەسىندە تۇرا الماي، باسىنا ءتاج كيىپ وتىر.