وڭتۇستىك قازاقستاندىق سوعىس ارداگەرلەرىنە ەلباسىنىڭ جاڭاجىلدىق قۇتتىقتاۋى تابىستالدى
ەلباسى اتىنان مەرەكەلىك سىي-سياپات جاسالدى.
بۇل تۋرالى و ق و اكىمى اپپاراتىنىڭ باسپا ءسوز قىزمەتىنەن حابارلادى.
الدىمەن وڭتۇستىك قازاقستان وبلىسىنىڭ اكىمى اسقار مىرزاحمەتوۆ ۇلى وتان سوعىسىنىڭ ارداگەرى قاراتاي تولەبەكوۆتىڭ ۇيىنە بارىپ، 91 جاستاعى ارداگەر-قاريانى قۇتتىقتادى. 1924 -جىلى العاباس اۋدانى جۇزىمدىك اۋىلىندا تۋىلعان ق. تولەبەكوۆ ۇلى وتان سوعىسىن 1942 -جىلى ماسكەۋدەن باستاپ، بالتيكادا اياقتاعان.
ەلگە 1950 - جىلى ورالىپ، اۋداندىق پارتيا كوميتەتىندە نۇسقاۋشى، شىمكەنت كووپەراتيۆتىك تەحنيكۋمىندا ديرەكتور، پوليتەحنيكالىق تەحيكۋمدا كافەدرا مەڭگەرۋشىسى، جوعارى وقۋ ورنىندا وقىتۋشى بولىپ ەڭبەك ەتكەن. جۇبايى 85 جاستاعى تىل ارداگەرى قىمبات اپا ەكەۋى 2 ۇل مەن 2 قىز تاربيەلەپ ءوسىرىپ، ولاردان 8 نەمەرە كورىپ وتىر.
ەلباسىنىڭ ەلگە دەگەن ىقىلاسىنا ءتانتى بولعان قاريا مەملەكەت باسشىسىنىڭ ۇلى وتان سوعىسىنىڭ 70 جىلدىعى قارساڭىنداعى جاڭا جىلدىق قۇتتىقتاۋىنا العىسىن جەتكىزدى. تاۋەلسىز قازاقستاندى ءوسىپ-وركەندەتۋ باعىتىندا اتقارىلىپ جاتقان ەلىمىزدەگى يگى تىرلىكتەردى قولدايتىنىن ايتتى.
وسىدان كەيىن ءوڭىر باسشىسى 92 جاسار ۇلى وتان سوعىسىنىڭ ارداگەرى شاليا اننا فەدوروۆنانىڭ شاڭىراعىندا بولىپ، ەلباسىنىڭ مەرەكەلىك قۇتتىقتاۋىن تابىستاپ، جاڭا جىلدىق سىي- سياپات جاسادى. مۇنداي ىستىق ىقىلاسقا قۋانعان ارداگەر مەملەكەت باسشىسىنىڭ مەرەكە قارساڭىنداعى قۇتتىقتاۋىن قۋانا قابىل الدى.
1923 - جىلعى 12 - ماۋسىمدا ارىس اۋدانىندا دۇنيەگە كەلگەن ا. شاليا 1941 - جىلى راديوتەلەگرافيستەر دايىندايتىن كۋرستى ءتامامداعان، 1943 - جىلى اسكەر قاتارىنا شاقىرىلىپ، رۋمىنيا، ۆەنگريا جانە چەحوسلوۆاكيانى جاۋدان ازات ەتۋگە قاتىسقان. 1946 - جىلى ەلگە ورالعاننان كەيىن ءبىلىم بەرۋ جانە پارتيا قاتارىندا ەڭبەك ەتىپ 1979 - جىلى زەينەتكەرلىككە شىققان. وبلىس اكىمىمەن بولعان سۇحبات بارىسىندا ارداگەرلەر مەملەكەت باسشىسىنا دەگەن قۇرمەتتىڭ ەرەكشە ەكەنىن ايتىپ، جاسالىپ وتىرعان قامقورلىققا العىستارىن ءبىلدىردى.
«كەلەسى جىلى ۇلى جەڭىستىڭ 70 جىلدىعىن تويلاعالى وتىرمىز. وسى مەرەيلى جىلعا وراي مەملەكەت باسشىسىنىڭ ارداگەرلەرگە كوڭىل ءبولىپ، ارنايى قۇتتىقتاۋ جولداپ وتىرعانى ءبىزدى ەرەكشە تەبىرەنتتى.
جەڭىستىڭ 60 جىلدىعىنا وراي ماسكەۋدە وتكەن اسكەري شەرۋگە بۇرىنعى وداقتاس ەلدەردەن تەك بەس ارداگەردەن عانا قاتىسسا، قازاقستاننان 25 ارداگەر قاتىستى. ءبىز مۇنى ەلباسىنىڭ اسقاق ابىرويىنىڭ بەلگىسى دەپ بىلەمىز»، - دەدى اننا شاليا.
بۇدان وزگە بۇگىن وبلىس اكىمىنىڭ ءبىرىنشى ورىنباسارى مەن اۋدان، قالا اكىمدەرى شىمكەنت قالاسى مەن سايرام، تولەبي اۋداندارىندا تۇراتىن ون سەگىز ارداگەردىڭ شاڭىراعىنا بارىپ، ەلباسىنىڭ مەرەكەلىك قۇتتىقتاۋىن تابىستادى.
ەلباسىنىڭ جاڭاجىلدىق سىيلىعىن و ق و-دا تۇراتىن 474 ارداگەر الادى.
