مىسىر تۇرعىندارىن «ءسۇيىنباي سازى» فولكلورلىق ەتنوگرافيالىق توبىنىڭ ونەرى ءتانتى ەتتى
بۇل فەستيۆالگە قازاقستاننىڭ، ءۇندىستاننىڭ، يسپانيانىڭ، بانگلادەشتىڭ، وڭتۇستىك سۋداننىڭ، مىسىردىڭ جانە تاعى باسقا ەلدەردىڭ شىعارماشىلىق ۇجىمدارى قاتىستى.
قازاقستان اتىنان مادەني شارادا الماتى وبلىستىق «ءسۇيىنباي سازى» فولكلورلىق ەتنوگرافيالىق توبىنىڭ ارتىستەرى ونەر كورسەتتى.
سونىمەن قاتار، ەلىمىزدىڭ مىسىرداعى ەلشىلىگىنىڭ ۇيىمداستىرۋىمەن اتالمىش توپ ارتىستەرى 24- جەلتوقساندا كاير قالاسىنىڭ ەڭ كورنەكتى، ءجۇز جىلدىق تاريحى بار مادەني ەسكەرتكىشتەرىنىڭ ءبىرى - اراب مۋزىكاسى تەاترىندا قازاقستان رەسپۋبليكاسىنىڭ تاۋەلسىزدىك كۇنىن جانە تۇڭعىش پرەزيدەنتى كۇنىن اتاپ ءوتۋ ءىس-شارالارى شەڭبەرىندە ارنايى كونسەرت قويدى.
«ءسۇيىنباي سازى» توبىنىڭ قويىلىمى مىسىر جۇرتشىلىعى، كايردە ورنالاسقان شەتەلدىك ديپلوماتيالىق كورپۋس وكىلدەرى جانە بۇقارالىق اقپارات قۇرالدارى تاراپىنان ۇلكەن قىزىعۋشىلىق تۋدىرىپ، ىستىق ىقىلاسقا يە بولدى. ءىس-شارا سوڭىندا ەلىمىزدىڭ مىسىرداعى ەلشىسى بەرىك ارىن وسى تەاتردا ورنالاسقان ۇلتتىق مۋزىكالىق اسپاپتار مۋزەيىنە قازاقتىڭ ەڭ باستى مۋزىكالىق اسپابى - دومبىرانى تارتۋ ەتتى.
