مەملەكەت باسشىسى قازاقستانعا قاجەت ءىرى كاسىپورىنداردى اتادى

استانا. قازاقپارات - بۇگىن استاناداعى تاۋەلسىزدىك سارايىندا ءوتىپ جاتقان يندۋستريالاندىرۋ كۇنى اياسىنداعى جيىن بارىسىندا ءسوز سويلەگەن ەلباسى نۇرسۇلتان نازاربايەۆ يننوۆاتورلار ءۇشىن ارنايى مەملەكەتتىك سىياقىنى تاعايىنداۋدى ۇسىندى.

مەملەكەت باسشىسى ساپالى بولات شىعارىتىن جاڭا مەتاللۋرگيالىق زاۋىتتى رۋدنىيدا نەمەسە قوستانايدا سالۋ دۇرىس بولاتىندىعىن اتاپ ءوتتى.

«سونىمەن قاتار مۇناي ونىمدەرىن شەتتەن سۇراماس ءۇشىن جاڭا مۇناي وڭدەۋ زاۋىتىن سالۋ قاجەت سەكىلدى. بۇل تۇرعىدا مۇناي ونىمدەرىن ءوزىمىز ساتقانىمىز دۇرىس»، - دەپ توقتالدى پرەزيدەنت.

مۇنىمەن قوسا ەلباسى مۇناي-گاز سالاسىندا بىرنەشە ءىرى كاسىپورىندار سالۋ قاجەتتىلىگىن جەتكىزدى. «ولار قىمبات جوبالار، ياعني 6-8 ميلليارد دوللاردى قۇرايدى. ءبىراق، بۇل وندىرىستەر حيميالىق ءونىمنىڭ تولىق جەلىسىن قامتيدى، ءدارى-دارمەكتەن باستاپ، كيىم-كەشەككە دەيىن شىعارۋعا قاۋقارلى»، - دەدى ن. نازاربايەۆ.

بۇعان قوسا، پرەزيدەنت بارشا الەمگە قاجەتتى ءونىم شىعارا الاتىن جاڭا مىس بالقىتۋ زاۋىتىن قازاقستاندا سالۋ كەرەك ەكەنىن قاداپ ايتتى.

«ەلىمىزدىڭ قورعاسىنى ەڭ جاقسى دەگەن اككۋمۋلياتورلاردى ونىدىرۋگە پايدالانىلۋى ءتيىس. ماقساتتار اۋقىمدى، وسى ورايدا يندۋستريا اتالعان جولمەن ءجۇرۋى ءتيىس»، - دەپ ەلباسى.

ءسوز سوڭىندا مەملەكەت باسشىسى وسىعان قوسا تاعى دا جاڭا 5 زاۋىتتىڭ قۇرىلىسى ءۇشىن ۇكىمەت الدىنا كەم دەگەن تاعى 5 ءىرى ترانسۇلتتىق كورپوراتسيانى تارتۋ ماقساتىن بەلگىلەدى.

اۆتور: رۋسلان عابباسوۆ