ەلباسى «التىن ساپا» بايقاۋىنىڭ ۇزدىكتەرىن ماراپاتتادى

استانا. قازاقپارات - بۇگىن استاناداعى تاۋەلسىزدىك سارايىندا يندۋستريالاندىرۋ كۇنى اياسىنداعى ەلباسى نۇرسۇلتان نازاربايەۆ «التىن ساپا» بايقاۋىنىڭ ارنايى سىيلىقتارىن يەلەنگەندەردى ماراپاتتادى.

پرەزيدەنت بايقاۋى اياسىندا «2014-جىلعى ۇزدىك يندۋستريالدى جوبا» اتالىمىندا ۇزدىك دەپ تانىلعان «اقتوبە رەلس ارقالىعى» زاۋىتىنا ءتيىستى ماراپاتىن تابىستادى.

مەملەكەت باسشىسى قازاقستاندا بۇدان ارى قاراي دا تەمىرجول سالىناتىنىن، سوندىقتان زاۋىتتىڭ ءونىمى قاجەت ەكەنىن اتاپ ءوتتى.

ال «2014-جىلعى وندىرىستەگى ۇزدىك يننوۆاتسيا» اتالىمىندا «پوسۋك تيتانيۋم» ج ش س تيتان قۇيمالارى مەن بالقىمالارى ءوندىرىسىنىڭ زاۋىتى جەڭىمپاز اتاندى.

ايتا كەتەيىك، «قازاقستان تەمىر جولى» كومپانياسى جەكە ينۆەستورلارمەن بىرگە اقتوبە رەلس ارقالىعى زاۋىتى قۇرىلىسىن اياقتاپ، بۇگىن جىلىتۋ پەشىن ىسكە قوسىپ جاتىر. جوبانىڭ قۋاتتىلىعى - جىلىنا 430 مىڭ مەتالل ءوندىرىسى. زاۋىت مەتالل يلەكتەرى جانە ۇزىندىعى 120 مەتردى قۇرايتىن، جوعارى جىلدامدىقتاعى ماگيسترالدارعا ارنالعان رەلستەر شىعاراتىن بولادى. بۇل ءونىم «قازاقستان تەمىر جولى» كومپانياسىنىڭ كاجەتتىگىن تولىق قامتاماسىز ەتەدى جانە ەكسپورتتاۋعا مۇمكىندىك بەرەدى.

سونىمەن قاتار ىسكە قوسىلعان «پوسۋك تيتانيۋم» زاۋىتى وسكەمەن تيتان- ماگني كومبيناتىمەن جانە وڭتۇستىك كورەيالىق «POSCO» كومپانياسىمەن بىرلەسە جۇزەگە اسىرىلدى. قازاقستاندا العاش رەت ەلەكتروندى-ساۋلەلى بالقىتۋ ادىسىمەن جىلىنا 6 مىڭ توننادان استام تيتاندىق قۇيمالاردى وندىرەتىن بولامىز. ءبىزدىڭ ءونىم كەمە قۇرىلىسى، مۇناي ءوندىرۋ، حيميا ونەركاسىبىندە، ەنەرگەتيكادا پايدالانىلادى.

اۆتور: رۋسلان عابباسوۆ