قازاقستان ءوزىنىڭ شيكىزاتىن ءوزى وڭدەيتىن بولسا، مۇرتىمىزدى بالتا شاپپاس ەدى - ن. نازاربايەۆ
بۇگىن استاناداعى تاۋەلسىزدىك سارايىندا يندۋستريالاندىرۋ كۇنى اياسىنداعى جيىن بارىسىندا ءسوز سويلەگەن ەلباسى نۇرسۇلتان نازاربايەۆ وسىلاي مالىمدەدى.
«وتكەن بەس جىل ىشىندەگى يندۋستريالاندىرۋدىڭ سيپاتى بارىمىزگە ايقىن. ءبىز ءارۋاقىتتا قازاقستان باي، جەر قويناۋىندا تەمىر دە، كومىر دە، مۇناي دا، گاز دا، التىن، كۇمىس، مىرىش تا بار دەپ جۇردىك. الايدا، سول بايلىقتىڭ بارلىعىن شيكىزات رەتىندە باسقا ەلدەرگە تاسىمالداپ، قىزىعىن سول ەلدەر كورىپ جاتتى. وتىز جىلدان بەرى مەن وسىنى ايتىپ كەلدىم، ال قازىر عانا ءبىز سىرتتا جاساپ جاتقان بايلىقتى ەلىمىزگە اكەلۋگە بەت بۇردىق. بۇل تاۋەلسىزدىكتى جاريالاپ قويماي، ونى ۇستاپ قالۋمەن بىردەي قيىن شارۋا»، - دەدى ن. نازاربايەۆ.
بۇل رەتتە ەلباسى بۇنداي شارۋانىڭ اسا كۇردەلى ەكەنىن، ويتكەنى، جاڭا تەحنولوگياسىن دا، جاقسى قوندىرعىسىن دا شەتەلدىكتەر وڭاي بەرە سالمايتىنىن اتاپ ءوتتى. «داعدارىس زامانىندا مۇناي مەن گاز سەكىلدى باسقا دا سىرتقا شىعارىپ جاتقان شيكىزاتقا باعالار قۇلدىراۋدا. مۇنايدىڭ باعاسى 120 دوللاردان 60 دوللارعا ءتۇستى، گاز دا سولاي. ال شيكىزاتتىڭ بارلىعىن ءوز ىشىمىزدە وڭدەيتىن بولساق، مۇرتىمىزدى بالتا شاپپاس ەدى»، - دەدى ن. نازاربايەۆ.
سونىمەن قاتار، پرەزيدەنت بۇل جۇمىستىڭ وڭايعا سوقپايتىنىن دا العا تارتتى. ەلباسىنىڭ ايتۋىنشا، بۇنداي جۇمىستى كورەيا، مالايزيا، قىتاي سەكىلدى ەلدەر 30-40 جىل ىشىندە جۇزەگە اسىرعان. ال ولارمەن سالىستىرعاندا قازاقستاننىڭ قارقىنى وتە جوعارى.
اۆتور: قانات مامەتقازى ۇلى
