نازاربايەۆ جانە قازاق ۇلتتىق ۋنيۆەرسيتەتتەرىندە «بولاشاق» ارقىلى ءبىلىم الاتىن جاستارعا ءتىل ۇيرەتەتىن كۋرس اشىلادى

استانا. قازاقپارات - كەلەر جىلى نازاربايەۆ ۋنيۆەرسيتەتىندە جانە ءال-فارابي اتىنداعى قازاق ۇلتتىق ۋنيۆەرسيتەتىندە «بولاشاق» باعدارلاماسى ارقىلى ءبىلىم الاتىن جاستارعا اعىلشىن ءتىلىن ۇيرەتەتىن كۋرستار اشىلادى.

بۇل تۋرالى بۇگىن شەتەلدە كادرلار دايارلاۋ جونىندەگى رەسپۋبليكالىق كوميسسيا وتىرىسى الدىندا ب ا ق وكىلدەرىنە سۇحبات بەرگەن ءبىلىم جانە عىلىم ءمينيسترى اسلان ءسارىنجىپوۆ ءمالىم ەتتى.

«كوميسسيا وتىرىسى بارىسىندا ءبىز ءبىرقاتار تۇلەكتەرگە «بولاشاق» ستيپەندياسىن بەرەتىن بولامىز. بۇگىن وسى كوميسسيا 200 دەن استام جاس مامانعا ستيپەنديا تاعايىندايدى. ولاردىڭ ىشىندە 220 ماگيسترانت بار. سونىمەن قاتار 10-15 ادام دوكتورانتۋرا ارقىلى شەتەلدە وقيتىن بولادى»، - دەدى ول.

ءمينيستردىڭ ايتۋىنشا، قازىرگى ۋاقىتتا شەتەلدە 2 مىڭنان استام جاس ءبىلىم الۋدا. ءبىراق وسى 20 -جىلدىڭ ىشىندە «بولاشاق» باعدارلاماسى ارقىلى 10 مىڭنان استام جاس ءبىلىم الدى. سونداي- اق مينيستر ءوز سوزىندە الداعى ۋاقىتتا «بولاشاق» باعدارلاماسى ارقىلى شەتەلدىڭ جوعارى وقۋ ورنىنا تۇسكەن جاستار ەلىمىزدە اعىلشىن تىلىنەن كۋرستان وتەتىندىگىن ايتتى.

«كەلەسى جىلدان باستاپ نازاربايەۆ ۋنيۆەرسيتەتىندە جانە الماتىداعى قازاق ۇلتتىق ۋنيۆەرسيتەتىندە اعىلشىن ءتىلىن ۇيرەتەتىن كۋرستار اشاتىن بولامىز. سونىڭ ناتيجەسىندە «بولاشاق» باعدارلاماسى ارقىلى شەتەلگە ءبىلىم الۋعا باراتىن جاستار قازاقستاندا اعىلشىنشا ۇيرەنەدى. ال بۇل قارجى ۇنەمدەۋگە مۇمكىندىك بەرەدى»، - دەدى ا. ءسارىنجىپوۆ.

اۆتور: مارلان جيەمباي