تارازدىقتار ەندى باسپانا ىزدەپ، باس قاتىرمايدى
ەلىمىزدە جۇرگىزىلىپ جاتقان «قولجەتىمدى تۇرعىن ءۇي-2020» باعدارلاماسىنىڭ دا كوزدەگەنى وسى.
اتالمىش جوبا ىسكە اسىرىلا باستاعان ارالىقتا جامبىل وبلىسىنىڭ اۋماعىندا 2 ميلليون شارشى مەترگە جۋىق تۇرعىن ءۇي پايدالانۋعا بەرىلدى.
تارازدا «استانا» جانە «بايتەرەك» اتتى قوس بىردەي جاڭا مولتەك اۋداندار بوي كوتەردى. وندا 2 مىڭ 418 وتباسى قونىس تويىن تويلادى. شاعىن قالالاردى دامىتۋ باعدارلاماسىنا ەنگەن جاڭاتاس پەن قاراتاۋدىڭ حالقى دا بۇل قۋانىشتان شەت قالمادى.
بيىل وڭىردە 256 مىڭنان استام شارشى مەتر تۇرعىن ءۇي سالۋ جوسپارلانعان. بۇگىنگى تاڭدا ونىڭ باسىم بولىگىنىڭ قۇرىلىسى اياقتالىپ، ەل يگىلىگىنە بەرىلدى. دەگەنمەن وبلىس كولەمىندە قازىرگى تاڭدا 11 مىڭنان استام ازامات پاتەر كەزەگىندە تۇر.
ونىڭ باسىم بولىگى تاراز قالاسىنىڭ تۇرعىندارى. وسى تۇيتكىلدى شەشۋ ماقساتىندا كونە شاھاردىڭ ماڭىنان تاعى ەكى مولتەك اۋدان سالۋ جوسپارلانىپ وتىر.
جامبىل وبلىسى اكىمىنىڭ ءبىرىنشى ورىنباسارى بەكبولات ورىنبەكوۆ:
- «14- مولتەك اۋدانعا اۆتوۆوكزال جاقتان 102 گەكتار جەردى مەملەكەت مۇقتاجىنا الىپ وتىرمىز. 362 گەكتار قالا ىشىنەن بەرىلگەن جەردى قايتاردىق. وسىعان ارنايى ەگجەي- تەگجەي جوسپار جاسالىپ، مەملەكەت تاراپىنان قارجى ءبولىنىپ، جەرگىلىكتى اتقارۋشى ورگاندار وبلىس اكىمىنىڭ قولداۋىمەن جوبالىق-سمەتالىق قۇجاتتارىن دايىنداپ جاتىرمىز»، - دەدى.
www.khabar.kz
