تويدا شاشۋدى تىكۇشاقپەن شاشۋ سانگە اينالادى

استانا. قازاقپارات - جەتىسىنە جەتى رەت تويعا بارۋدان جالىقپايتىن حالىقپىز عوي.

تويدان قالۋ بىزگە جۇمىستان قالعانان دا قيىن.

جىلىنا قانشا تويعا باراتىنىمىزدى ساناساق، سانىنان جاڭىلىسامىز. ەڭ قىزىعى، تۋعان-تۋىس- دوس-جاراننىڭ تويلارىنا بارعان سايىن توي جاساۋدىڭ كۇننەن-كۇنگە قىمباتتاپ بارا جاتقانىن بايقايسىڭ.

«الاش ايناسى» وسىعان دەيىن بىرنەشە رەت تويدىڭ بيۋدجەتىن ەسەپتەۋگە تىرىسقان بولاتىن. الايدا توي شىعىنى ەسەبىنە جەتكىزەر ەمەس.

جاقىندا ءبىر دوسىم قىزىنىڭ 1 جاسقا تولعان تويىن جاسادى. تۇرمىسى ورتاشا سانالاتىن، جاسى 35 تەگى دوسىمنىڭ مەيرامحانادا جاساعان تويىنا 200 قوناق جيىلدى. داستارحان جايۋعا كەتكەن شىعىننان بولەك تويدىڭ ۇساق-تۇيەگىنە كەتكەن شىعىندى ويشا ساناپ ەدىم، جىپىرلاعان سانداردان ابدەن جاڭىلىستىم. قانداي ۇساق-تۇيەك دەيسىز عوي؟

بىرىنشىدەن، مەيرامحانانىڭ ءىشىن اسەمدەۋ، شار مەن گۇلدىڭ ءتۇر-ءتۇرى. الگى ايارۋ اتتى كىشكەنە قىزدىڭ ەسىمىن ءتىپتى قول سۇرتەتىن مايلىقتارعا دەيىن جازدىرىپتى، تويدا تاراتىلعان سىيلىقتار - قالتافون، جۇمساق ويىنشىقتار، ىدىستار، كادەسىيلار.

تويباستاردىڭ تاباعى ءىرى-ءىرى ويىنشىق ماشينالارمەن الماستىرىلعان، ءىشى تولعان قىمبات-قىمبات تاتتىلەر. تاعى ءبىر تويعا بارىپ قول سۇرتەتىن مايلىقتاردىڭ جيەگىن قىمبات سۆاروۆسكي تاستارمەن كومكەرىلگەنىن دە كوز كوردى. تويعا بارا بەرسەڭ كورە بەرەدى ەكەنسىڭ. كورمەگەنىمىز بولسا، ەستىگەنىمىز جەتەدى. ەستۋىمىزشە، شىمكەنتتىڭ ءبىر تويىندا قالىڭدىق مەيرامحاناعا تىكۇشاقپەن جەتكىزىلىپتى.

جاقىندا سول شىمقالادا 9 قاباتتى قوناق ءۇي سالىنىپ، ەڭ جوعارعى قاباتى تويحانا بولادى، تويحانانىڭ ءبىر جاعى تىكۇشاق قوناتىن الاڭقايعا اينالماق...

ال مىنا ءبىر سۋرەت فەيسبۋك پاراقشاسىنداعى توي تۋرالى قىزۋ تالقىلاۋلارعا سەبەپ بولعان ەدى.

 مىقتىبەك ورازتاي ۇلى - تويدا جۇرگەنىمدە اعىن-توگىن داستارحاندى كورىپ ادامدار «ءبىزدى قۇرتاتىن وسى توي عوي، تويعا شىعىندى ازداۋ شىعارساق قازاقتان باي حالىق بولماس ەدى» دەپ جاتاتىن. «توي -قۇدايدىڭ قازىناسى، كەڭ بولساڭ كەم بولمايسىڭ» دەپ ەندى بىرەۋلەر وعان قارسى ءۋاج ايتادى. قالاي دەسەك تە، بەتالدى ىسىراپتى ءوز باسىم قالامايمىن. تويلارىمىز توي ەمەس، باسەكەگە اينالىپ كەتكەلى قاشان...

قارىزدانباي توي جاسايتىن شاڭىراق كەم دە-كەم. قارىزدى موينىنا ءىلىپ الادى دا، بانك اتاۋلىنى سىقپىرتا بوقتاپ جۇرەدى. «سونشاما شىعىن شىعارىپ نەم بار ەدى، وزىمە دە وبال جوق» دەپ ويلاي ما ەكەن؟ «قاتتى جەرگە قاق تۇرار...» شىعىنشىل حالىقپىز. مويىندايمىن. (facebook.com پاراقشاسىنان)

 

Qaji A. Ayubi - مەن دانيادا تۇراتىن قازاقپىن. دانيا حالقى قارىز الماي 300-500 ادامعا توي جاساي الادى، ءبىراق تويلارىندا 50 شاقتى عانا ادام بولادى. ويلانىپ قاراسام دانيالىق پەن قازاقتىڭ اراسىندا ايىرماشىلىق بار. 1) قازاق باسقالاردىڭ كوزقاراسىن كوپ قاجەت ەتەدى، ال دانيالىقتار ءوز كوزقاراسىمەن جۇرەدى. 2) قازاق اسىرا ماقتانشاق جانە ماقتاعاندى جاقسى كورىدى، ال دانيالىقتاردى اسا ماقتاساڭ، سەنى دوس رەتىندە كورمەيدى. 3) قاراپ تۇرساڭىز دامىعان ەلدىن ادامدارى ماقتانشاق بولمايدى، ال دامىماعان ەلدىن ادامداردى كوپ ماقتانشاق بولادى. قازاقتىڭ تويعا جانە باسقادا نارسەلەرگە جارىسى وسى 3 فاكتورگە بايلانىسى بار دەپ ويلايمەن (facebook.com پاراقشاسىنان).

وسىدان ءبىراق ۋاقىت بۇرىن داۋلەت تۇرلىحانوۆتىڭ قىزى توي كويلەگىن 50 مىڭ دوللارعا الىپتى دەپ ب ا ق بەتتەرىندە اقپاراتتار جاريالانعان بولاتىن. سوندا ءبىر ءۇيدىڭ قۇنىنا پاراپار كويلەك كيۋگە دە بولادى ەكەن عوي تاڭعالىپ ەدىك... سويتسەك، قازىر ءبىزدىڭ قالتالىلاردىڭ قىزدارى جارتى ميلليون دوللاردىڭ كيىمىن دە كيەدى ەكەن.

اۆتور: اينۇر نۇرسابەت

Alashainasy.kz