الماتى قالاسىنىڭ ۇزدىك وقۋشىلارى پرەزيدەنتتىك جاڭاجىلدىق شىرشاعا قاتىستى - فوتو
شارا بارىسىندا ولار ق ر پرەزيدەنتىنىڭ بالالارعا ارنالعان بەينەقۇتتىقتاۋىن تىڭدادى. وندا ەلباسى قازاقستاندىق بالالاردى جاڭا جىل مەرەكەسىمەن قۇتتىقتاپ، دەندەرىنە ساۋلىق، وقۋدا جاڭا تابىستارعا جەتە بەرۋلەرىنە تىلەكتەستىك ءبىلدىردى.
«ءبىز جاڭا جىل مەرەكەسىن جاڭا تابىستارمەن، جاڭا جەتىستىكتەرمەن قارسى الايىن دەپ وتىرمىز. سىزدەر دە بيىل جاقسى ەڭبەك ەتتىڭىزدەر. ويتكەنى، بۇگىنگى شىرشاعا ۇزدىك وقيتىن، بەلسەندى، دارىندى بالالار شاقىرىلدى. سىزدەر جىل بويى جاقسى باعالارعا قول جەتكىزىپ، بايقاۋلاردا، جارىستاردا جەڭىسكە جەتتىڭىزدەر. مەن بۇعان اسا قۋانىشتىمىن. مەن بارلىق قازاقستاندىق بالالاردىڭ دەندەرى ساۋ بولىپ، زەيىندى، زەرەك بولىپ وسكەندەرىن قالايمىن. سىزدەر تاۋەلسىزدىك جىلدارى تۋدىڭىزدار. ەلىمىز سىزدەردىڭ ءبىلىم الۋلارىڭىزعا، دەمالىستارىڭىزعا بارىنشا قولايلى جاعداي جاساۋعا ۇمتىلدى. مەن سىزدەردىڭ تاربيەلى، ءبىلىمدى جانە ءوز وتانىن شەكسىز سۇيەتىن پاتريوت ازاماتتار بولىپ وسەتىندەرىڭىزگە سەنەمىن. بۇگىنگى شىرشا مەن سىيلىقتار سىزدەرگە ەستەن كەتپەس قۋانىش سىيلايدى دەگەن ۇمىتتەمىن. مەن سىزدەرگە دەنساۋلىق جانە باقىت تىلەيمىن. سپورتپەن اينالىسىڭىزدار، ەرەسەك ومىردە قاجەت بولاتىن پايدالى ىستەرمەن اينالىسىڭىزدار دەگىم كەلەدى» ، - دەدى نۇرسۇلتان نازاربايەۆ.
ءوز كەزەگىندە الماتى قالاسىنىڭ اكىمى احمەتجان ەسىموۆ تە بالالاردى جاڭا جىل مەرەكەسىمەن قۇتتىقتاپ، ءوتىپ بارا جاتقان جىلدىڭ ءبىلىم جىلى بولىپ جاريالانعانىن اتاپ ءوتتى.
«الماتىدا ءبىلىم جىلى اياسىندا ءبىلىم سالاسىنا 70 ميلليارتان استام تەڭگە ءبولىندى. بۇل قالا تاريحىندا بولىپ كورمەگەن وقيعا. ءبىز بۇل قارجىعا جاڭا ءبىلىم مەكەمەلەرىن سالدىق. مەكتەپتەر زاماناۋي كەرەك- جاراقتارمەن جابدىقتالدى. مۇعالىمدەر قازىرگى زامانعى ادىستەمەلەرمەن تولىققاندى جۇمىس ىستەۋلەرى ءۇشىن ولارعا جاعداي جاسادىق. ناتيجەسى كوڭىل قۋانتادى. ءبىزدىڭ مەكتەپ وقۋشىلارىمىز وسىمەن ءۇشىنشى جىل قاتارىنان ۇ ب ت قورىتىندىسى بويىنشا ءبىرىنشى ورىندا كەلەدى. الماتىلىق وقۋشىلار الداعى ۋاقىتتا دا جاقسى ناتيجەلەر كورسەتەدى دەگەن سەنىمدەمىن. سوندىقتان قازىردىڭ وزىندە ۇلكەن ومىرگە دايىندالۋ كەرەك. بۇل ءۇشىن ءبىلىم الۋعا ۇمتىلىڭىزدار. سپورتپەن اينالىسىڭىزدار. 2015 - جىل حالقىمىز ءۇشىن جەمىستى جىل بولعاي»، - دەدى ا. ەسىموۆ.
بۇگىنگى شىرشادا بالالار ءۇشىن ەرتەگى كەيىپكەرلەرىنىڭ قاتىسۋىمەن مەرەكەلىك باعدارلاما قويىلدى. بارلىق وقۋشىلار ق ر پرەزيدەنتى اتىنان سىيلىقتار الدى.
