تۇرعىن ءۇي قاتىناستارى ماسەلەلەرىن قامتىعان قۇجات قابىلداندى - ءماجىلىس

استانا. قازاقپارات - بۇگىن پارلامەنت ءماجىلىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ءۇي قاتىناستارى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا سەنات ەنگىزگەن تۇزەتۋلەردى قاراپ، بۇعان كەلىسىمىن بەردى.

ەسكە سالايىق، بۇعان دەيىن سەناتورلار ءماجىلىس ماقۇلداعان قۇجاتقا 15 تۇزەتۋ ەنگىزىپ قايتارعان ەدى.

 ايتا كەتەيىك، قۇجات بويىنشا تۇرعىن ءۇي قاتىناستارى سالاسىندا اكىمشىلىك قۇقىق بۇزۋشىلىقتاردىڭ جاڭا قۇرامدارى ەنگىزىلەدى. مەملەكەتتىك تۇرعىن ءۇي الۋعا ۇمىتكەر ادامداردىڭ توبىن انىقتاۋ ماقساتىندا «بيۋدجەتتىك ۇيىمدار» ۇعىمى ەنگىزىلەدى. سونىمەن قاتار، ۋاكىلەتتى ورگانداردىڭ تۇرعىن ۇيگە قويىلاتىن تەحنيكالىق تالاپتارى بويىنشا قۇزىرەتىن انىقتاۋ قاراستىرىلىپ، كوندومينيۋم نىسانىن باسقارۋ ورگاندارى قىزمەتىنىڭ اشىقتىعىن قامتاماسىز ەتۋ كوزدەلەدى.

بۇدان بولەك، قابىلدانعان زاڭدا كوپ بالالى وتباسىلاردىڭ مەملەكەتتىك تۇرعىن ءۇي قورىنان باسپانا العانعا دەيىن ولاردىڭ كەزەگىن ساقتاۋ، ۇلى وتان سوعىسىنىڭ قاتىسۋشىلارى مەن مۇگەدەكتەرىنە جانە سولارعا تەڭەستىرىلگەن ادامدارعا بەرىلەتىن جەڭىلدىكتەر مەن ولاردى الەۋمەتتىك قورعاۋ، جەتىم بالالاردىڭ، اتا- انالارىنىڭ قامقورلىعىنان ايىرىلعان بالالاردىڭ تۇرعىن ۇيگە ءسوزسىز قۇقىعىن ساقتاي وتىرىپ، ولاردىڭ اراسىندا پاتەرلەر ءبولۋ ءۇشىن ەڭ كەمى جيىرما پايىزدىق كۆوتا بەكىتۋ تۋرالى ۇسىنىستار دا قابىلدانعان.

 ەندى قۇجات مەملەكەت باسشىسىنا قول قويۋ ءۇشىن جولدانادى.

اۆتور: قانات مامەتقازى ۇلى