ق ر پرەزيدەنتى شىرشاسىنا كەلگەن ءار بالاعا ەلباسى اتىنان سىيلىق بەرىلەدى

استانا. قازاقپارات - بۇگىن استاناداعى وقۋشىلار سارايىندا «ماڭگىلىك ەلدىڭ قاسيەتتى قۇندىلىقتارى» اتتى قازاقستان رەسپۋبليكاسى پرەزيدەنتىنىڭ شىرشاسى وتەدى. سالتاناتتى شاراعا بالالار ۇيلەرىنىڭ تاربيەلەنۋشىلەرى، تۇرمىسى تومەن جانە كوپ بالالى وتباسىلاردان شىققان بالالار مەن مۇگەدەك بالالار قاتىسادى، دەپ حابارلادى astana.kz.

جاڭا جىلدىق باعدارلاما بارىسىندا ەرتەگى كەيىپكەرلەرىمەن تەاترلاندىرىلعان قويىلىم كورسەتىلىپ، بايقاۋلار مەن ۆيكتورينالار وتكىزىلەدى. شاراعا قاتىسۋشىلار وقۋشىلار سارايىن ارالايدى (پلانەتاري، ينتەراكتيۆتى پاركتى جانە ت. ب. تاماشالايدى)، ءتۇرلى ويىن-ساۋىق شارالارىنا قاتىسىپ، مەرەكەلىك داستارحاننان ءدام تاتادى.

شىرشاعا كەلگەن ءاربىر بالاعا ق ر پرەزيدەنتىنىڭ اتىنان سىيلىقتار بەرىلەدى.

استانا قالاسى ءبىلىم باسقارماسىنىڭ حابارلاۋىنشا، جاڭا جىلدىق شىرشاعا 9-13 جاستاعى 200 بالا شاقىرىلدى. سونىڭ ىشىندە، 117 جەتىم، قالعان بالالار كوپ بالالى جانە تۇرمىسى تومەن وتباسىلاردان شىققان.