قىتايدا بالا سانى كۇرت كوبەيدى
بيىل، سونىمەن قاتار، قىتايدا بوسانعان انالار مەن نارەستەگە قاجەتتى تاۋارلاردىڭ ساۋداسى ارتىپ، سابيلەرگە كەرەكتى دۇنيەلەردى ينتەرنەتتەن ساتىپ الۋ 35 پايىزعا وسكەن، دەپ حابارلادى www.24.kz.
ارنا ءتىلشىسىنىڭ ايتۋىنشا، قىتايداعى بالا تۋۋ سانىنىڭ كۇرت ءوسۋىنىڭ ەكى سەبەبى بار. ءبىرىنشىسى، ارينە، ءبىر بالا ساياساتىنىڭ جۇمسارتىلۋى، ەكىنشىسى - جىلقى جىلى قىتايلىقتار ءۇشىن قاسيەتتى سانالادى. سوندىقتان ىرىمشىل حالىق جايسىز بولاتىن قوي جىلىندا ەمەس، بالالى بولۋدى بيىل جاپپاي جوسپارلاعان. قىتايدىڭ 31 پروۆينتسياسىنىڭ 29 ىندا ءبىر بالا ساياساتىن وزگەرتىپ، ەگەر ەرلى- زايىپتىلاردىڭ ءبىرى وتباسىندا جالعىز وسسە، ەكىنشى بالا سۇيۋىنە رۇقسات ەتتى. وسىلايشا 70-جىلداردىڭ سوڭىندا دەموگرافيانى رەتتەۋ ءۇشىن ەنگىزىلگەن ساياسات جۇمسارتىلدى.
- ەكى بالالى بولۋ ءبىز سەكىلدى جاس وتباسىلارعا جاقسى بولدى. جالعىز بالا ءوزىمشىل بولىپ وسەدى، سوندىقتان ءبىز ەكىنشىسىن وسى جىلعا جوسپارلادىق، - دەيدى بەيجىڭ قالاسىنىڭ تۇرعىنى ساي جياۋ.
گۋاڭدۇڭ پروۆينتسياسىندا دا جۇكتى ايەلدەردى كوپ كەزدەستىرۋگە بولادى. بيىل ناۋرىز ايىنان باستاپ جاڭا دەموگرافيالىق ەرەجە جاريا بولعان ەلدى مەكەندەگى پەرزەنتحانادا بوس ورىن قالماعان. سوندىقتان قوسىمشا تاعى 40 توسەك قويدىردى. بۇدان بولەك، ەكىنشى بالاسىنا جۇكتى كەلىنشەكتەر بوساناتىن ۋاقىتى كەلمەسە دە، ورىنداردى الدىن الا دايىنداپ قويعان.
ءبىر بالا ساياساتى قىتايدا قارتتار سانىنىڭ كوبەيۋىنە اكەلدى. بۇدان بولەك، ءار وتباسى ۇرپاق جالعاستىراتىن ۇل بالانى قالاپ، بويىنا قىز بالا بىتسە، الدىرتىپ تاستايتىن. سونىڭ كەسىرىنەن 10 جىلدان كەيىن ەلدە 30 ميلليون ءسۇر بويداققا قالىڭدىق جەتىسپەۋى مۇمكىن. بۇل ماسەلەگە قازىردىڭ وزىندە قىتايلىق اتا- انالار الاڭداۋلى. ولار اپتاسىنا ءۇش رەت بەيجىڭدەگى ورتالىق ساياباقتا قالىڭدىق پەن كۇيەۋ بالالار جارمەڭكەسىن وتكىزىپ تۇرادى. اقپارات پاراقشاسىندا ۇمىتكەردىڭ سالماعى، بويى، ءتىپتى ايلىق تابىسى دا كورسەتىلگەن. قۇدا- قۇداعي بولۋدان ۇمىتتىلەر تەلەفون الماسىپ، كەيىن جاستاردى ۇگىتتەيدى.
بۇگىندە 30 جاستىڭ اينالاسىنداعى ءسۇربويداقتاردىڭ باسىم بولىگى وتباسىندا جالعىز وسكەن ەركەلەر ەكەن. ولاردىڭ ۇيلەنگىسى كەلمەي ءجۇرىپ الۋى دا سول بولسا كەرەك. 2050 - جىلعا قاراي مۇنداعى حالىقتىڭ ¼- ءى زەينەتكەر بولادى دەگەن بولجام بار.
