الماتىدا «قازاق كوتەرىلىستەرى» جيناعى جارىق كوردى
كونفەرەنسيا اياسىندا ق ر جوعارى وقۋ ورىندارى قاۋىمداستىعى، ش. ءۋاليحانوۆ اتىنداعى تاريح جانە ەتنولوگيا ينستيتۋتى جانە «قازاق ەنتسيكلوپەدياسى» ج ش س-مەن بىرلەسىپ شىعارعان «قازاق كوتەرىلىستەرى» اتتى كولەمدى ەنتسيكلوپەديانىڭ تۇساۋكەسەر ءراسىمى بولدى.
جيناقتا 50 دەن استام اۆتوردىڭ 870 كە جۋىق ماقالاسى بەرىلگەن.
اتالعان ءىس-شارانى قازاقستان رەسپۋبليكاسى جوعارى وقۋ ورىندارى قاۋىمداستىعىنىڭ پرەزيدەنتى راحمان الشانوۆ كىرىسپە سوزبەن اشىپ، جيىننىڭ ماقسات-مۇددەسىنە توقتالدى. الماتى قالالىق جاستار ساياساتى جونىندەگى باسقارما باسشىسى ماركەن احمەتوۆ ءوز لەبىزىن بىلدىرسە، «قازاق ەنتسيكلوپەدياسىنىڭ» باس ديرەكتورى، «قازاق كوتەرىلىستەرى» ەنسيكلوپەدياسىنىڭ باس رەداكتورى، پروفەسسور باۋىرجان جاقىپ جيناقتا قامتىلعان تاريحي تاقىرىپتاردى كەڭىنەن ءسوز ەتتى.
ش. ءۋاليحانوۆ اتىنداعى تاريح جانە ەتنولوگيا ينستيتۋتىنىڭ جەتەكشى عىلىمي قىزمەتكەرى، دوتسەنت ساۋلەبەك رۇستەموۆ «ءبىرىنشى دۇنيەجۇزىلىك سوعىس: قازاقتار اراسىنداعى الەۋمەتتىك- ساياسي ۇدەرىستەر»، ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى سەرىك ماشىمبايەۆ «ءبىرىنشى دۇنيەجۇزىلىك سوعىس جىلدارىنداعى جەتىسۋ جانە تورعاي وبلىستارىنداعى كوتەرىلىس»، ش. ءۋاليحانوۆ اتىنداعى تاريح جانە ەتنولوگيا ينستيتۋتىنىڭ جەتەكشى عىلىمي قىزمەتكەرى راشيد ورازوۆ «قازاقستانداعى ءبىرىنشى دۇنيەجۇزىلىك سوعىس تۇتقىندارى»، قورقىت اتا اتىنداعى قىزىلوردا مەملەكەتتىك ۋنيۆەرسيتەتى جانىنداعى «قورقىت تانۋ جانە ولكە تاريحى» عىلىمي-زەرتتەۋ ينستيتۋتىنىڭ مامانى باقىتجان احمەتبەك ء«بىرىنشى دۇنيەجۇزىلىك سوعىستاعى قازاق حالقىنىڭ ساياسي-الەۋمەتتىك احۋالى» اتتى تاقىرىپتاردا بايانداما جاساپ، ويلارىمەن ءبولىستى.
قازاقستانداعى ۇلت-ازاتتىق كوتەرىلىستەرى مەن قوزعالىستار تاريحى جانە ولاردىڭ كوسەمدەرى مەن قاھارمان تۇلعالارى تۋرالى مول ماعلۇمات تۇڭعىش رەت ەنتسيكلوپەديالىق جۇيەمەن ءبىر جيناققا توپتاستىرىلىپ بەرىلىپ وتىرعانىن ايتا كەتكەن ابزال.
«انا ءتىلى» گازەتى
