اياز اتا ەكەن دەسەم

استانا. قازاقپارات - ءىنىم ءبىرىنشى سىنىپقا بارعان جىلى مەكتەپتەگى العاشقى جاڭا جىل كەشىنە قاتتى دايىندالعان ەدى.

جاياۋ مۇسانىڭ «اق سيسا» ءانىن قولىنا قامشى الىپ ايتاتىن بولعان.

ۇيدە كۇندە دايىندىق جاسايدى. سودان ول اسىعا كۇتكەن جاڭا جىل كەشى دە كەلدى.

ول ساحناعا شىقتى. ءبىر كەزدە جۇرتشىلىقتىڭ قوشەمەت، قولداۋىنان قاناتتانىپ كەتسە كەرەك، «اق سيسانىڭ» وزىندىك يىرىمىنە وراي داۋسىن قاتتى زورايتىپ، ايقايعا باسقان ول قولىنداعى قامشىسىن قاتتى سەرمەپ قالدى.

ءسويتىپ، بالالاردىڭ قىزىقتى كەشىنىڭ ايتۋلى قوناعى بولىپ تۇرعان اياز اتانىڭ اق ساقالىن قامشىسىنىڭ ۇشىنا ىلە كەتتى. بالانىڭ توسىن ىسىنە داۋا بار ما، اياز اتا دا، كورەرمەن دە دۋ كۇلكىگە كەنەلدىك.

تاپ وسى جەردە ءانىن توقتاتقان ءىنىم «ءسىزدى راسىمەن دە اياز اتا ەكەن دەسەم، مۇحتار اعاي ەكەنسىز عوي» دەپ قويىپ قالدى. زالداعى كۇلكى ودان سايىن ۇدەي ءتۇستى. اياز اتامىز «اق سيسانىڭ» ورىنداۋشىسىنا سىيلىعىن ۇسىندى دا، قامشى ۇشىنداعى ماقتا ساقالىن جالما-جان الىپ، ساحنادان ىعىسا بەردى...

ءىنىم تاعى قاراپ قالماي، «ءسىز جاڭا ءوز سوزىڭىزدە سەندەرگە اسقار-اسقار تاۋلاردان جەتىپ، ءوز سىيلىعىمدى اكەلدىم دەگەنسىز. ال مىناۋىڭىز كەشە انام تارازدان اكەلگەن سىيلىق قوي. نەگە الدايسىز؟»  دەپ قاپالاندى. بالانىڭ بۇل نازىن اياز اتامىز جۇرە تىڭداپ كەتە باردى...

سودان بەرى ءىنىمنىڭ اياز اتاعا، ونىڭ سىيلىعىنا، جاڭا جىل كەشىنە دەگەن قىزىعۋشىلىعى سۋ سەپكەندەي باسىلىپ كەتتى.

سوڭعى جىلدارى ءبىلىم وشاقتارىندا اياز اتانىڭ قورجىنىنا سالاتىن سىيلىقتى اتا-انالاردىڭ وزىنە ۇيدەن دايىنداتىپ اكەلۋ ۇردىسكە اينالىپ كەتكەنى قاتەلىك بولدى دەپ ويلايمىن.

ءتىپتى، كەي اتا-انالار سىيلىقتى بالاسىنان بەرىپ جىبەرىپ، «ەرتەڭ ساعان وسىنى اياز اتاڭ بەرەدى» دەي سالادى نەمقۇرايلىقپەن.

قايتا ءبىزدىڭ كىشكەنتاي كەزىمىزدە ءبارى شىنايىراق بولاتىن. اپايلارىمىز بىزگە «نەعۇرلىم ولەڭ، تاقپاقتارىڭدى جاقسى ايتساڭدار اياز اتالارىڭ ەڭ ادەمى سىيلىعىن سەندەرگە ۇسىنادى» دەيتىن.

ءبىز سوعان قاتتى يلانىپ، ونىڭ قورجىنىندا نە بولاتىنىن بىلمەي تاعاتسىزدانا كۇتەتىنبىز. ءتىپتى، اياز اتامىز كەلىپ، كەتكەنشە ونىڭ مەكتەپتەگى اعايلارىمىزدىڭ ءبىرى ەكەندىگىن دە بىلمەيتىنبىز.

ءبارى سەنىمدى، نانىمدى شىعاتىن. ال قازىر شە، بالالاردىڭ قيالىن، ارمانىن ءوزىمىز اياق استى ەتىپ ءجۇرمىز. ولار الدىمەن اياز اتاعا ءوزى سىيلىق بەرىپ، ەرتەسىنە ونى قايتا الادى. ونى اسىعا كۇتپەيدى دە.

ويتكەنى، ىشىندە نە بارىن ءوزى بىلەدى. قىزىق ەمەس. وسى جاعىن اتا-انالار، ءبىلىم وشاقتارىنىڭ ۇيىمداستىرۋشىلارى ەسكەرىپ، بالالالارعا نانىمدى بولاتىن جاقتارىن ويلاستىرسا دەيسىڭ. جاڭا جىل قارساڭىندا وسى وقيعا ەسىمە ءتۇسىپ وتىرعانى...

فاريزا ابدىكەرىموۆا

Alashainasy.kz