قازاقستاندىقتاردىڭ جاڭاجىلدىق سىيلىققا قانشا اقشا جۇمسايتىنى انىقتالدى
ساۋالناما ناتيجەسىندە وڭتۇستىك پەن سولتۇستىك استانا تۇرعىندارىنىڭ مەرەكەگە قانداي سىيلىقتار دايىنداپ قويعانى انىقتالدى.
ساۋالناماعا الماتى مەن استانا قالاسىنىڭ 18-65 جاس ارالىعىنداعى تۇرعىندارى قاتىستى. قاتىسۋشىلار جاڭا جىلدا ەڭ جاقىن تۋىستارىنا قانداي جانە قانشالىقتى قىمبات سوماداعى سىيلىق سىيلاۋعا دايىن ەكەنىن ايتتى.
ساۋالناما ناتيجەسىنە قاراعاندا، ادامداردىڭ جاڭا جىل مەرەكەسىنە ارنالعان سىيلىقتارعا ورتاشا ەسەپپەن 17450 تەڭگە جۇمسايتىنى انىقتالدى.
رەسپوندەنتتەردىڭ 24 پايىزى تۇرمىستىق تەحنيكا مەن زاماناۋي گادجەت سىيلايمىز دەسە، 14 پايىزى - ويىنشىقتار، 12 پايىزى - تاتتىلەر، 10 پايىزى - ءيىسسۋلار مەن كوسمەتيكا، 7 پايىزى - سىيعا بەرىلەتىن سەرتيفيكاتتار، 3 پايىزى - اشەكەي جانە باعالى بۇيىمدار مەن 1 پايىزى تۋريستىك جولداما سىيلايتىنىن ايتقان.
سونىمەن قاتار ساۋالناماعا قاتىسقانداردىڭ ءاربىر ءتورتىنشىسىنىڭ (24 پايىز) ەشكىمگە ەشقانداي سىيلىق سىيلامايتىنى بەلگىلى بولدى، ال قاتىسۋشىلاردىڭ 6 پايىزى تۋىستارىنا سىيلىقتى ءوز قولدارىمەن جاساپ بەرەتىنىن ايتتى.
ەسكە سالا كەتەيىك، بۇعان دەيىن قازاقستاندىقتاردىڭ وسى جىلى ميلليونداعان دوللارعا شامپان مەن ماندارين ساتىپ العانىن حابارلاعان بولاتىنبىز.
