قوس مۇحيتتىڭ اراسىن جالعايتىن كانال قۇرىلىسى باستالدى

استانا. قازاقپارات - نيكاراگۋا رەسپۋبليكاسىندا اتلانت مۇحيتى مەن تىنىق مۇحيتىنىڭ اراسىن جالعاۋ ماقساتىندا جىلدار بويى قىزۋ تالقىلانىپ كەلگەن كانال قۇرىلىسى ءوز جۇمىسىن باستادى.

ونىڭ اشىلۋىنا نيكاراگۋا ۇكىمەتىنىڭ ۆيتسە-پرەزيدەنتى ومار الەسليەۆەنس پەن جوبانى جۇزەگە اسىرۋشى قىتايلىق «HKND Group» كومپانياسىنىڭ پرەزيدەنتى ۆان سزين دە قاتىستى. رەسمي بيلىك وكىلدەرى جوبا تولىعىمەن جۇزەگە اسقان جاعدايدا ايماق تۇرعىندارىنىڭ الەۋمەتتىك جاعدايى جاقسارىپ، ەلدىڭ ەكونوميكاسىنا قوماقتى ۇلەس قوسىلاتىندىعى ءسوزسىز دەپ مالىمدەدى.

قۇنى 50 ميلليارد ا ق ش دوللارىن قۇرايتىن جوبا قۇرىلىسى الداعى بەسجىلدىقتا تولىق اياقتالادى دەپ جوسپارلانعان بولسا، ونىڭ جالپى ۇزىندىعى 280 شاقىرىمعا سوزىلماق.

ال اتالعان قۇرىلىس نىسانىنا قارسىلىق بىلدىرۋشىلەر بولسا، جوبانى جۇزەگە اسىرۋ ارقىلى قورشاعان ورتا مەن ايماق تۇرعىندارىنا قالپىنا كەلتىرە الماستاي وراسان زور زيان تيگىزەتىن بولامىز دەپ سانايدى.

جالپى، نيكاراگۋا ۇكىمەتى بۇل جوبانى پاناما كانالىمەن سالىستىرعاندا باعاسىنان ارزان، ساپاسى جوعارى وتكەل رەتىندە باعالاپ وتىر. ونىڭ تەرەڭدىگى 26-30 مەتر، ال ەنى 230-530 مەتر ارالىعىندا بولادى. سونداي-اق، جالپى ۇزىندىقتاعى 280 شاقىرىمنىڭ 105 شاقىرىمى قۇرلىق ورتاسىنداعى نيكاراگۋا كولىنىڭ ەنشىسىنە تيەسىلى كورىنەدى جانە ونىمەن ءجۇرىپ ءوتۋ ۋاقىتى شامامەن 30 ساعاتتى قۇرايدى.

ەستەرىڭىزگە سالا كەتەيىك، «ۇلى مۇحيتارالىق نيكاراگۋا كانالى» (Gran Canal Interoceanico por Nicaragua) قۇرىلىسىنىڭ جوباسى 2012-جىلدىڭ 4- ماۋسىمىندا نيكاراگۋا ۇلتتىق جيىنىندا 61 داۋىسپەن ماقۇلدانىپ، قابىلدانعان بولاتىن (25 «قارسى» داۋىس).

مامانداردىڭ پىكىرىنە سۇيەنسەك، مۇحيتارالىق قاتىناستى جانداندىراتىن بۇل كانال ءوزىنىڭ باسەكەلەسى پاناما كانالىنا قاراعاندا ارناسى كەڭ جانە تەرەڭ. وسىنداي مۇمكىندىگىمەن ول الەمدىك تەڭىز تاسىمالىنداعى ءتاريفتى 5 پايىزعا دەيىن تومەندەتۋى مۇمكىن كورىنەدى.

Baq.kz