نۇرسۇلتان نازاربايەۆ ۋكراينانىڭ پرەمەر- ءمينيسترى ارسەني ياسەنيۋكپەن كەزدەستى
بۇل تۋرالى اقوردانىڭ باسپا ءسوز قىزمەتىنەن حابارلادى.
كەزدەسۋ بارىسىندا قازاقستان مەن ۋكراينا قارىم- قاتىناستارىنىڭ احۋالى مەن بولاشاعى، ساۋدا- ەكونوميكالىق ىنتىماقتاستىقتى دامىتۋ جولدارى تالقىلاندى.
سونداي- اق حالىقارالىق كۇن تارتىبىندەگى وزەكتى ماسەلەلەر مەن ۋكرايناداعى جاعدايدى ۋشىقتىرماۋعا باعىتتالعان كۇش- جىگەر جونىندە پىكىر الماسىلدى.
قازاقستان پرەزيدەنتى ەكى ەلدىڭ ساۋدا- ەكونوميكالىق ىنتىماقتاستىعىنىڭ بۇرىنعى كورسەتكىشتەرىن قالپىنا كەلتىرۋ ءۇشىن بارلىق مۇمكىندىكتەر بار ەكەنىنە توقتالدى.
«ت م د- دا قابىلدانعان ەركىن ساۋدا ايماعى تۋرالى كەلىسىمگە سايكەس ءبىز ەكونوميكالىق بايلانىستاردى دامىتۋعا ءتيىسپىز. ءبىزدىڭ ەلدەرىمىزدىڭ اراسىندا جۇمىسىنا ءوزىڭىز قاتىساتىن ۇكىمەت ارالىق كوميسسيا جۇمىس ىستەيتىن بولادى. ىنتىماقتاستىق جولدارىن تابۋى ءۇشىن ءبىزدىڭ بيزنەسمەندەرىمىزدىڭ قاتىسۋىمەن وتەتىن فورۋم جوسپارلانۋدا» ، - دەدى نۇرسۇلتان نازاربايەۆ.
مەملەكەت باسشىسى قازاقستاندىقتاردىڭ ۋكرايناداعى جاعدايعا الاڭدايتىنىن، تۇراقتىقتىڭ قالپىنا كەلەتىنىنە ۇمىتتەنەتىنىن ايتتى.
«ۋكراين ۇلتىنىڭ 330 مىڭ قازاقستاندىق ازاماتى - ءبىزدىڭ ەلدەرىمىزدىڭ اراسىنداعى دانەكەر. ءبىز ۋكراينانىڭ قالىپتاسقان احۋالدان شىعىپ، بەيبىت دامي باستاعانىن قالايمىز»، - دەدى قازاقستان پرەزيدەنتى.
ا. ياسەنيۋك ۋكراينا مەن قازاقستاننىڭ اراسىندا ەجەلدەن تىعىز ەكونوميكالىق جانە ساياسي قارىم- قاتىناستار بولعانىنا توقتالدى.
«بىزدە ءوزارا ءىس- قيمىلدىڭ ەكى نەگىزگى باعىتى بار: ساۋدا جانە ەنەرگەتيكا. ءبىز وسى تۇستا ىلگەرىلەي الامىز. ءبىزدىڭ ەكىجاقتى ەكونوميكالىق ىنتىماقتاستىعىمىز تەك جاقسارا بەرۋى تيىستىگىنە سەنىمدىمىن. ەگەر ءبىز تاۋار اينالىمىن ۇلعايتۋعا باعىتتالعان دۇرىس ءارى ايقىن شەشىمدەر قابىلدايتىن بولساق، وندا ول ەلدەرىمىزگە پايدا اكەلەتىن بولادى»، - دەدى ۋكراينا پرەمەر- ءمينيسترى.
