تاۋەلسىزدىك تولعاۋى: تاۋەلسىزدىك ۇعىمى كوڭىل قۋانتىپ، جۇرەكتى نۇرلاندىرادى - و. قۋانىشبايەۆ

 قىزىلوردا. قازاقپارات - تاۋەلسىز ەلدە ەڭبەك ەتۋ باقىتى بۇيىرىپتى ءبىزدىڭ ۇرپاقتىڭ ەنشىسىنە. وسى جىلدار ىشىندە ەگەمەن ەلدىڭ اتىنان تالاي شەتەلدەردە بولىپ، تاجىريبە الماسىپ قايتتىم. قيا باسساڭ، سوناۋ ماسكەۋدىڭ رۇقساتىن كۇتىپ وتىراتىن زامان كەلمەسكە كەتتى.

 تاۋەلسىزدىك ۇعىمى كوڭىلدى قۋانتادى، جۇرەكتى نۇرلاندىرادى، دەيدى قىزىلوردا قۇرىلىس جانە بيزنەس كوللەدجىنىڭ ديرەكتورى ورىنباي قۋانىشبايەۆ.

«حالقىمىزدىڭ قاستەرلى تاۋەلسىزدىگى مەن ماڭگىلىك ەلىمىزدىڭ بولاشاعى مەنى ۇنەمى تولعاندىرادى. «تاۋەلسىزدىكتىڭ ومىرلىك فيلوسوفياسى قانداي بولۋى كەرەك؟ » دەگەن ساۋالدى مەن وزىمە ءسات سايىن قويىپ وتىرامىن» دەدى ەلباسى ءوزىنىڭ «تاۋەلسىزدىك تولعاۋى» اتتى ەڭبەگىندە. مەملەكەت باسشىسىنىڭ ءاربىر ءسوزىن زەيىن قويىپ تىڭداپ، ەلىمىزدىڭ ۇستانعان باعىت- باعدارىن سالماقتاپ جۇرەمىن» ، - دەيدى و. قۋانىشبايەۆ.

 ونىڭ ايتۋىنشا، 14 ءتۇرلى كاسىپ يەلەرىن دايارلايتىن وقۋ ورنىندا ۇلت كوشباسشىسىنىڭ كەلەلى پىكىرلەرى ۇجىم مۇشەلەرىمەن تالقىلانىپ، كوللەدج قابىرعالارىنا كورنەكى ەتىپ جازىلىپ تا قويىلعان.

«بۇگىندە جاستاردىڭ كاسىپتىك ءبىلىم الىپ، قوعامداعى ءوز ورنىن تابۋى ەلباسىنىڭ الدىمىزعا قويىپ وتىرعان مىندەتتەرىنىڭ بىرەگەيى دەسەم بولادى. ءاربىر جىلى جەلتوقسان ايىنداعى ەڭ ءبىر قاسيەتتى مەرەكە - تاۋەلسىزدىك كۇنىندە پرەزيدەنتىمىز ۇلتىنا ءوزىنىڭ جۇرەكجاردى سوزدەرىن ارنايدى. وسى كۇنى سول كيەلى ۇعىم قايتا ءبىر جاڭعىرىپ سالا بەرەدى. ونىڭ ءمانى مەن مازمۇنىن جاستاردىڭ ساناسىنا ءسىڭىرىپ، ەلىم، جەرىم دەيتىن ۇرپاق تاربيەلەۋگە ۇلەس قوسۋ ۇستازدار بورىشى بوپ قالا بەرەدى» ، - دەپ تۇيىندەدى ءوز ءسوزىن ءبىلىم ورداسىنىڭ باسشىسى.

 

اۆتور: ەلۋباي اۋەزوۆ