م. جولداسبەكوۆ ەلباسىنىڭ جۇرت بىلە بەرمەيتىن وقيعاسى تۋرالى ايتىپ بەردى

استانا. قازاقپارات - قوعام قايراتكەرى، فيلولوگيا عىلىمدارىنىڭ دوكتورى، پروفەسسور، جازۋشى، عالىم مىرزاتاي جولداسبەكوۆ ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە ەلباسىنىڭ «تاۋەلسىزدىك تولعاۋى» ەسسەسىنە قاتىستى وتكەن بريفينگتە مەملەكەت باسشىسى نۇرسۇلتان نازاربايەۆتىڭ حالىق بىلە بەرمەيتىن وقيعاسىمەن ءبولىستى.

«جۇرت بىلە بەرمەيتىن ءبىر وقيعانى ايتايىن. اللا قازاقتىڭ جاسىن كورىپ، تاۋەلسىزدىك ورناتتىق. ول كەزدە قازاقتىڭ ۇلەسى 39,7 پايىز عانا ەدى. ونداي حالىق سانىمەن تاۋەلسىزدىك ورناتقان دۇنيە جۇزىندە حالىق قازاقتان باسقا جوق شىعار. وسى ورايدا قازاقستاندا تۇرىپ جاتقان وزگە حالىقتاردىڭ بارلىعىنا شىن جۇرەكتەن العىس ايتۋ كەرەكپىز. سودان 1991-جىلى جەلتوقساندا سايلاۋ وتكىزدىك. ەندى پرەزيدەنتتىڭ يناۋگۋراتسياسىن وتكىزۋىمىز كەرەك بولدى. تاجىريبە جوق ول كەزدە. ءبىراق دۇنيە جۇزىنەن تاجىريبە جينادىق، كوكەيىمىزدە قازاقتىڭ باياعى سالتى - حاندى اق كيىزگە كوتەرۋ. مىنبەردىڭ ۇستىنە اق كيىز قويايىق دەپ شەشتىك. سول كەزدە اق كيىزدىڭ ۇستىندە تۇرىپ، انت بەردى، كوزىنە مولتىلدەپ جاس كەلدى»، - دەپ باستادى جازۋشى.

«سودان ول كىسى ورنىنا كەلىپ وتىردى. ءسويتىپ وتىرعاندا سىرتىمىزدان جەل سوعىپ كەتتى دە، شىمىلدىق قوزعالىپ كەتىپ، تۋ سىرتىندا تۇرعان كوك بايراعىمىزدى قۇلاتىپ بارا جاتتى. مەنىڭ جۇرەگىم توقتاپ قالا جازدادى. سويتكەندە ارتىندا كوزى بار ادام سياقتى نۇرەكەڭ تۋدى ۇستاپ الدى. كەشكە نۇرەكەڭە ايتتىم: «ەندى قيسايىپ بارا جاتقان تۋدى قالاي ۇستاپ قالدىڭىز؟ قۇداي قالاسا، قازاقتىڭ تۋى ەندى جىعىلمايدى ەكەن»، - دەدىم. قۇدايعا شۇكىر، قازاقتىڭ تۋى جەلبىرەپ تۇر قازىر»، - دەدى م. جولداسبەكوۆ.

سونىمەن قاتار قوعام قايراتكەرى م. جولداسبەكوۆ ن. نازاربايەۆتىڭ مەكتەپ جاسىندا ۇستازدىق ەتكەن جىلدارىن دا تەبىرەنە ەسكە الدى.

«قازاقستان ماڭدايىندا جالعىز ق ا ز م ۋ دەيتىن ۋنيۆەرسيتەت بولدى. مەن سونىڭ ءتورتىنشى كۋرسىن اياقتار تۇستا قالانىڭ ىرگەسىندە ورنالاسقان قاسكەلەڭگە پەداگوگيكالىق تاجىريبە الۋعا باردىم. ونداعى اباي اتىنداعى قازاق ورتا مەكتەبىنە جولىم ءتۇستى. سوندا نۇرسۇلتان 10-سىنىپتىڭ وقۋشىسى ەدى. مەن ساباق بەردىم. سىنىبى وتە تالانتتى بولاتىن. ونىڭ ىشىندە جاستايىنان كوش باستايتىن ادام عوي، نۇرسۇلتان سونىڭ كوشباسشىسى بولدى. ەكى كوزى وتتاي جانىپ، سۇراقتىڭ نەشە اتاسىن قوياتىن. كەيىن نۇرسۇلتاننىڭ تەمىرتاۋعا، ودان قاراعاندىعا بارعانىنان جاقسى بىلەم. بارىپ تۇردىق، كوردىك كوزىمىزبەن»، - دەپ ءتۇيدى ويىن عالىم.

اۆتور: جاسۇلان جولدىبايەۆ