اقىن ت. تۇياقبايدىڭ جاڭا جىر جيناعى جارىققا شىقتى

استانا. قازاقپارات - قازاقستان رەسپۋبليكاسى مادەنيەت جانە سپورت مينيسترلىگىنىڭ باعدارلاماسى بويىنشا استانا قالاسىنداعى «فوليانت» باسپاسىنان اقىن تورەگەلدى تۇياقبايدىڭ «ءتورت توعىس: ءسوز ءبيى كىتابى» اتتى جاڭا ەڭبەگى جارىققا شىقتى.

اقىن تورەگەلدى تۇياقباي وقىرماندارعا ءوزىنىڭ «باستاۋ»، «ءوز كوزىممەن»، «قارلى قۇيىن»، «ورمان اڭىزى»، «جان داۋىسى»، «سۇيمەگەندەر ساعىنبايدى» اتتى پوەزيا كىتاپتارىمەن جانە كوركەم اۋدارما تۋىندىلارىمەن جاقسى تانىس. ولەڭدەرى بىرنەشە تىلگە اۋدارىلعان اقىننىڭ بەلورۋس تىلىندە «سنەجنى چالاۆەك» (1992) اتتى كىتابى جارىق كورگەن.

ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى، فيلولوگيا عىلىمدارىنىڭ دوكتورى سەرىك نەگيموۆ «جۇيەلى ويعا، كيەلى سوزگە ىنتازار اقىن» دەگەن تاقىرىپپەن وسى كىتاپقا العى ءسوز جازعان. «ءتورت توعىس» اتتى ءسوز ءبيى كىتابىندا اۆتوردىڭ اقىندىق جولداعى ماقساتى، وي-پاراساتى، زامانعا، قوعامعا، ۋاقىتقا، ۇلتقا كوزقاراسى ايقىن كورىنىس تاپقان.

«ولەڭ ءسوزدى وزگەشە ءورىپ، سىڭعىرلاتقان، ويشىلدىق پەن رۋحاني سۇلۋلىق، نازىكتىك پەن سىرشىلدىق ءبىرتۇتاس قۇبىلىسقا اينالعان. «ءسوز الدى» دەيتىن لەبىزىندە اقىندىق كرەدوسى تايعا تاڭبا باسقانداي ايقىن سيپاتتالعان. ءسوزدىڭ ءمانىن، سىمبات-ءسانىن، ورامىن، رەتىن قيۋلاستىرىپ كەلتىرۋ، تىگىسىن جاتقىزۋ، ورەلى وي-پىكىرلەرمەن تۇزدىقتاۋ، وقىرماننىڭ زەردە، سانا ايناسىندا تەرەڭ ءىز قالدىرۋ - اقىن تورەگەلدىنىڭ سۇيىكتى مانەرى»، - دەيدى عالىم سەرىك نەگيموۆ.

اقىننىڭ جاڭا تۋىندىسى 9 باسپا تاباقتان، 216 بەتتەن تۇرادى.

اۆتور: ايدىن بايمەن